Aýa raıy
Astana 6 °S
Almaty 7 °S
valıýta baǵamy
USD 421.58
EUR 496.83
RUB 5.53
CNY 62.20

Bıyl tumaý men koronavırýs qatar júredi, bosańsýǵa bolmaıdy – dáriger

2020 jyldyń 15 qyrkúıek 2020 14:40

PETROPAVL. QazAqparat – Soltústik Qazaqstan oblysynda sanıtarııa dárigerleri bıyl tumaý men koronavırýs ınfektsııasynyń qatar júretinin eskertip, juqpaly aýrýlardan saqtaný joldaryn aıtty, dep habarlaıdy QazAqparat tilshisi.

SQO taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, 15 qyrkúıekten bastap óńirde tumaýǵa qarsy ekpe egý jumystary bastaldy. Tek bir kúnniń ishinde 3 myńǵa jýyq adam vaktsınatsııadan ótti.

Mamandardyń aıtýynsha, koronavırýstyq ınfektsııa bastapqy kezeńinde vırýstyq ınfektsııaǵa uqsas keledi. Ýaqyt óte kele aıyrmashylyqtary shyǵady. Ádette sýyq tıgende dene qyzýy kóteriledi, murynnan sý aǵyp, túshkiredi, tamaǵy aýyrady. Al koronavırýsty ınfektsııada dene qyzýy qatty kóterilip, qurǵaq jótel paıda bolady.

«Koronavırýsty juqtyrǵanda álsizdik bolyp, súıek syrqyraýy múmkin. Tamaq aýyryp, demalý qıyndaıdy. Bas aýyrady. Tumaýdan taǵy bir ózgesheligi – dám men ıis sezbeıdi. Jedel respıratorly vırýstyq ınfektsııa 3 kúnnen bir aptaǵa deıin sozylsa, qaýipti aýrýda ol 14 kúnnen 3 aptaǵa deıin júrýi múmkin.

Maýsymdyq tumaý birden joǵary temperatýradan bastalady. Bas aýyryp, býyndar men súıekter syrqyrap aýyrady. Jótel múlde bolmaýy da múmkin. Tumaýda bul jaǵdaı ádette 5 kúnge ǵana sozylady», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Tatıana Gorlova.

Sanıtarııa dárigeriniń aıtýynsha, tumaýdy emdeýge vırýsqa qarsy oseltamıvır jáne zanamıvır preparattary qoldanylady eken. Oblystyń emdeý mekemelerinde qazir 2037 qaptama osyndaı dári bar.

«Bıyl jedel respıratorlyq vırýstyq ınfektsııalardyń bastalýy koronavırýsty ınfektsııanyń taralýymen tuspa-tus kelmekshi. Sol sebepti bosańsymaý kerek. Koronavırýsty jeńgenimiz joq, vırýs bar. Ony biz ǵana emes, álemniń eshqandaı memleketi jeńe almaı otyr. JRVI, tumaý jáne koronavırýsty ınfektsııanyń aldyn alýdyń eń ońaı joly – maska taǵý. Maskany aýyrǵandar ǵana emes, saý adamdar da taǵýy tıis. Sonaı-aq áleýmettik qashyqtyqty saqtap, bólmelerdi jıi jeldetip turǵan jón. Qoldy sabyndap jýý, muryndy álsiz tuzdy sýmen shaıý jáne durys tamaqtanyp, polıdárýmender ishý – juqpaly aýrýlarmen kúreste sep», - deıdi Tatıana Gorlova.


Joǵary qaraı