Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Bıyl memqyzmetshiler men olardyń jubaıyna joldanǵan aýdarymdar ǵana tekseriledi

2022 jyldyń 15 sáýir 2022 15:14

NUR-SULTAN. QazAqparat – QR Qarjy mınıstrligi Memlekettik kirister komıteti memlekettik qyzmetter departamenti memlettik qyzmetter basqarmasynyń basshysy Vladlen Balan mobıldi aýdarymdardy baqylaý týraly kúshine engen buıryqtyń mánin túsindirdi, dep habarlaıdy QazAqparat tilshisi.

Mamannyń aıtýynsha, kásipkerlik qyzmetpen aınalyspaıtyn qarapaıym qazaqstandyqtarǵa bul ózgeris eshqandaı áser etpeıdi.

«Birinshi kezeńde 2022 jyldyń qorytyndysy boıynsha bul ólshemder memlekettik qyzmetshiler men olarǵa teńestirilgenderge, solardyń jubaılaryna qatysty bolady. ıAǵnı, 2022 jyldyń qorytyndysy boıynsha jańaǵy sanattarǵa kiretin naqty tulǵalardyń tizimi qalyptasady. Bul tizim ekinshi deńgeıli bankterge joldanady. Ekinshi deńgeıli bankter ázirlengen ólshemsharttar boıynsha álgi tizimdegi tulǵalardy búgin kúshine engen zańnyń talaby boıynsha tekserip shyǵady. Tizimdegi tulǵalardyń derekteri osy ólshemsharttarǵa sáıkes kelse, memlekettik kirister organyna qaıta jiberiledi. Biz bankterdiń bergen deregi boıynsha jumys isteımiz. Bul memlekettik kiris organdary jeke tulǵalardyń shottaryn jappaı baqylaýǵa alady degen sóz emes. Baqylaý tek bankterdiń tekserýi kezinde anyqtalǵan buzýshylyqtar boıynsha ǵana júrgiziledi», - dedi basqarma basshysy.

Aıtýynsha, bul jerdegi ólshemshart degen uǵym jeke tulǵalardyń bank shotyna bir aıdyń ishinde basqa 100-den astam jeke tulǵadan mobıldi aqsha aýdarymdary túsýin bildiredi.

«Úsh aı boıy meniń bank shotyma mobıldi aýdarym arqyly aı saıyn 100-den artyq jeke tulǵanyń shotynan aqsha tústi deıik. Mundaı jaıtty biz kásipkerlikpen kásipker retinde tirkelmeı aınalysý táýekeli retinde qaraımyz. Al jeke kásipker retinde tirkelgen bolsańyz, onyń tabysyn jeke tulǵa retinde ashylǵan shotqa qabyldaı almaısyz. Jeke kásipker retinde ashqan shotyńyzǵa ǵana tólem qabyldaýyńyz kerek», - dep túsindirdi Vladlen Balan.

Komıtet ókili búginnen bastap búkil qazaqstandyqtardyń shotyn bankterge teksertkeli jatpaǵanyn basa aıtty.

«Jyl saıyn tizim jasap, jiberip otyramyz. Tıisinshe, ákimshilendirý nátıjesine súıene otyryp, ólshemder pysyqtalady. Joǵaryda aıtqan ólshemsharttar barynsha keń etip alyndy. Bul ólshemsharttardy ekinshi deńgeıdegi banktermen aqyldasyp bekittik. Bastapqyda jeke tulǵanyń bank shotyna aı saıyn aqsha aýdarǵan ártúrli tulǵalardyń sanyn 50-ge deıin qysqartaıyq degen másele týyndaǵan. Keıin 100 degen ólshemge toqtadyq. Óıtkeni halyqtyń túgelge jýyǵy Kaspi qosymshasy arqyly aýdarym jasap júr. Týystar, jaqyn dostar men otbasy músheleri arasyndaǵy aýdarym ólshemshartqa enip ketpeýi úshin 100-ge keńeıttik», - deıdi memlekettik kirister komıtetiniń basqarma basshysy.

Sondaı-aq, ol bıyl nege memlekettik qyzmetshiler men olarǵa teńestirilgender, olardyń jubaılarynyń shottary ǵana mobıldi aýdarymdar boıynsha tekseriletinin túsindirdi.

«Jyl saıyn tizim jasap otyramyz dedim ǵoı. Mysaly osy jyldyń qorytyndysy boıynsha memlekettik qyzmetkerler men solarǵa teńestirilgenderdiń, jubaılarynyń tizimin ekinshi deńgeıli bankterge jiberemiz. Ekinshi kezeńde, ıaǵnı, 2023 jyly kvazımemlekettik sektor qyzmetkerleri men bıýdjettik sala qyzmetkerleriniń, olardyń jubaılarynyń tizimin jiberemiz. Odan keıin, ıaǵnı, 2024 jyly kásipkerler men zańdy tulǵalardyń basshylary men quryltaıshylarynyń, olardyń jubaılarynyń tizimin jiberip teksertemiz. Osydan keıin baryp qana, ıaǵnı, 2025 jyly bankter búkil jeke tulǵalardyń bank shottaryn zerdeleıdi. Bul kezeńge jetkenge deıin tájirıbe barysynda ólshemsharttardy jetildire túsemiz. Sol arqyly ólshemsharttarǵa ádiletsiz enýi táýekelderin azaıtamyz», - dedi Vladlen Balan.

Qarapaıym tilmen aıtsaq, Qarjy mınıstriniń mobıldi aýdarymdarǵa qatysty buıryǵy búginnen bastap búkil qazaqstandyqtardyń jeke tulǵa retinde ashqan shottaryn baqylaýǵa almaıdy.

Qandaı sanatqa jatatynyna qaramastan búkil tulǵalardyń bank shotyna jasalatyn aýdarymdardy baqylaý tek 2025 jyly bastalady.

«Mysaly, búginnen bastap kásipker retinde tirkelmese de, jolaýshy tasymaldap júrgen jeke tulǵa memlekettik qyzmetshi bolmasa, bıyl onyń shoty tekserilmeıdi. Jalpaq tilmen aıtqanda, ondaı adamnyń 2025 jylǵa deıin osylaı tabys taba turýyna múmkindik bar. Biraq mobıldi aýdarym jasaýǵa arnalǵan QR-tardy paıdalanǵan durys»,- dedi Memlekettik kirister komıtetiniń basqarma basshysy.

Eske salsaq, búginnen bastap Qarjy mınıstriniń jeke tulǵalardyń mobıldi aýdarymdaryn baqylaýdy retteıtin buıryǵy kúshine endi.


Joǵary qaraı