Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Bıyl Qaraǵandy oblysynda úsh jańa mektep pen bir balabaqsha ashylady

2022 jyldyń 26 qańtar 2022 22:09

QARAǴANDY. QazAqparat – Bıyl Qaraǵandy oblysynda 9 jańa bilim berý nysany, onyń ishinde úsh mektep pen bir balabaqsha óz jumysyn bastaıdy, dep habarlaıdy QazAqparat tilshisi.

Bilim berý júıesiniń damýy jáne qashyqtan oqytýdyń bilim sapasyna áseri týraly oblystyń bas pedagogy Gúlsim Qojahmetova aıtyp berdi.

Gúlsim Shabdanqyzy, balalar osymen ekinshi jyl qatarynan onlaın formatta bilim alyp jatyr. Qashyqtaǵy bilimniń sapasy týraly aıtyp berseńiz...

Qashyqtyqtan oqytý, árıne, bilimge áser etti, sondyqtan olqylyqtardy toltyrý boıynsha jumys júrgizilýde. Birinshi kezekte ne isteý kerektigin anyqtaý úshin biz barlyq pánder boıynsha bastapqy dıagnostıkalyq bólimder júrgizdik. Olardyń nátıjeleri negizinde balalardyń bilim sapasyn arttyrý boıynsha jumys josparlary jasaldy.

Búgingi kúni oblystyń barlyq pedagogtary tsıfrlyq saýattylyq boıynsha biliktilikti arttyrý kýrstarynan ótti. Olar úshin únemi onlaın-rejımde jumys tehnologııalaryn jetildirý boıynsha sheberlik sabaqtary ótkiziledi.







Degenmen, qashyqtan oqytý kezinde belgili bir qıyndyqtar bar. Olardyń ishinde balalarda qarym-qatynastyń azdyǵyn, qurdastar men muǵalimderdiń qoldaýynyń joqtyǵyn atap ótýge bolady. Muǵalimderge de ońaı emes. Qashyqtan oqý kezinde búkil synyppen bir ýaqytta baılanys ornatýǵa, tapsyrmalardyń oryndalýyn baqylaýǵa jáne sabaq barysynda barlyq oqýshylardyń taqyrypty qabyldaýyn baqylaýǵa múmkindik joq.

Biraq qashyqtan bilim berý tájirıbesiniń artyqshylyqtaryn atap ótpeske bolmaıdy. Mysaly, aýa-raıynyń qolaısyzdyǵyna nemese oqýshylardyń densaýlyǵyna baılanysty sabaqtardy toqtatqan kezde biz sabaqtardy qashyqtan ótkize alamyz. Sondaı-aq kezdesýlerdi, synyp saǵattaryn, jınalystardy is júzinde uıymdastyrýǵa múmkindik bar. Balalar ózderine yńǵaıly ýaqytta bilim alyp, jańa tehnologııalardy ıgere alady.

Kadrlyq máselege toqtalar bolsaq. Jas mamandardy, mysaly, aýyldyq mektepterde jumys isteýge qalaı tartasyzdar?

Qazirgi ýaqytta oblystyń bilim berý uıymdaryna 100-den astam maman qajet. Ásirese, orys tilinde oqytatyn bastaýysh synyp muǵalimderi, orys tili, fızıka, matematıka, hımııa pánderiniń muǵalimderi qajet.




Jańa oqý jylynda biz myńnan astam pedagogty jumysqa qabyldadyq, olardyń 500-ge jýyǵy jas mamandar. Eki júz muǵalim «Dıplommen aýylǵa» baǵdarlamasy boıynsha jiberildi. Olar úshin áleýmettik kepildikter qarastyrylǵan – bul turǵyn úıdi jalǵa alǵany úshin ótemaqy tóleý, kommýnaldyq qyzmetterdi tóleý, turǵyn úı satyp alý nemese salý úshin kóterme járdemaqy berý.

Aıta ketý kerek, kómek tek aýyldyq jerlerdegi muǵalimder ǵana kórsetilip jatqan joq. Ótken jyly alǵash ret 24 pedagog qyzmettik páter aldy.

Qazir ınklıýzıvti bilim berýge kóp kóńil bólinýde. Osy jaıly tolyǵyraq toqtalyp ótseńiz...

Oblysta erekshe bilim alý qajettiligi bar 12 myńnan astam bala turady. Inklıýzıvti bilim berý úshin mektepke deıingi uıymdardyń 36,2%, jalpy bilim beretin mektepterdiń 81% jáne kolledjderdiń 50,7% jaǵdaı jasalǵan.

Ótken jyly Temirtaýda ońaltý ortalyǵy ashyldy, onda ártúrli psıhofızıkalyq aýytqýlary bar 54 balaǵa psıhologııalyq-pedagogıkalyq qoldaý kórsetiledi.

Jóndeý jumystary jasalǵan soń Qaraǵandyda psıhologııalyq-medıtsınalyq-pedagogıkalyq keńes kabıneti jáne oblys ortalyǵy men Satbaev qalasynda eki psıhologııalyq-pedagogıkalyq túzetý kabıneti ashylady.

Qaraǵandyda «AsylMıras» qoǵamdyq qorynyń qoldaýymen aýtızm jáne mentaldy erekshelikteri bar balalarǵa arnalǵan ońaltý ortalyǵyn qurý boıynsha jumys júrgizilýde.

Sondaı-aq, Qaraǵandynyń jalpy bilim beretin mektepteriniń bazasynda «Bolashaq» QQ birlesip ınklıýzııany qoldaıtyn úsh kabınet ashý josparlanýda.

Erekshe balalarmen jumys isteý úshin muǵalimder oqytylady. Inklıýzıvti bilim berý úshin oqýlyqtar men oqý-ádistemelik keshender satyp alynady.

Al shaǵyn jınaqty mektepterdiń bolashaǵy bar ma?

Oblysta 209 shaǵyn jınaqtalǵan mektep bar, onda 14 myńǵa jýyq bala oqıdy. Shaǵyn jınaqty mektepterdi damytý úshin «Aýyl mektebi» jáne «Qamqorlyq» jobalary jumys isteıdi. Aqtoǵaı aýdanynda «Ýaqytsha otbasy» jobasyn iske qosýdy josparlap otyrmyz. Onyń máni shalǵaı aýyldardaǵy balalar otbasylarda turyp, tolyq jınaqtalǵan mektepterde oqı alady. Al «Mobıldi muǵalim» Jańaarqa aýdanynda tájirıbeli oqytýshyǵa birneshe eldi mekenniń ShJM-ne barýǵa múmkindik beredi.




Ótken jyly 61 aýyl mektebi jańǵyrtyldy, jóndeý jumystary júrgizildi, materıaldyq-tehnıkalyq baza men qaýipsizdik júıesi nyǵaıtyldy.

Oblysta qosymsha bilim berýdiń jaǵdaıy qalaı?

Búgingi tańda 107 memlekettik qosymsha bilim berý uıymy jáne 12 jeke menshik uıym jumys isteıdi.

Ótken jyly Aqtoǵaı, Jańaarqa, Shet, Qarqaraly aýdandarynda jáne Qaraǵandyda balalardy qosymsha damytý úshin bes nysan ashyldy. Sonymen qatar Qaraǵandy, Balqash, Shahtınsk, Temirtaý, Abaı, Osakarov, Buqar Jyraý aýdandarynda jeti balalar tehnoparki paıda boldy.

Qazirgi ýaqytta Sátbaev qalasynda Oqýshylar saraıynyń jańa ǵımaratynyń qurylysy jalǵasýda.

Balalardy túrli úıirmeler men sektsııalarǵa belsendi tartýǵa bıyldan bastap qosymsha bilim berýge memlekettik tapsyrys barlyq menshik nysanyndaǵy – jeke jáne memlekettik obektilerde ornalasqandyǵy kómektesti.

Bıyl qandaı jańa bilim berý nysandary salynady ?

Mektepterde oqýshylardyń shekten tys kóptigimen baılanysty másele áli tolyq sheshilgen joq, biraq oblysta mundaı bilim berý uıymdary óte az. Qazir biz Qaraǵandy, Qarqaraly jáne Jańaarqa aýdandarynda úsh mektep salyp jatyrmyz. Buqar Jyraý jáne Qarqaraly aýdandaryndaǵy apatty mektepterdiń ornyna osy jyldyń úshinshi toqsanynda jańalaryn salý josparlanýda. Qazir jobalyq-smetalyq qujattama ázirlenýde.

Sondaı-aq, bıyl oblys ortalyǵyndaǵy lıtseıge qosalqy túrde salynǵan ǵımarat, Saran qalasyndaǵy sport zaly jáne Sátbaev qalasyndaǵy Oqýshylar saraıy paıdalanýǵa berilýi tıis.

«Aýyl – El besigi» jobasy boıynsha ótken jyly Shet jáne Jańaarqa aýdandarynda eki japsarlas qurylys – sport zaldarynyń qurylysy bastaldy.

Bıyl Sátbaev qalasynda 320 oryndyq balabaqshanyń qurylysy aıaqtalady.

Oblystyń barlyq bilim berý uıymdarynda dabyl túımeleri men qulaqtandyrý júıeleri ornatylǵan. Oblystyń barlyq 496 mektebi beınebaqylaý kameralarymen (19 837 birlik) jabdyqtalǵan.

Bul jyl Qazaqstanda «Balalar jyly» dep jarııalandy. Oblys pedagogtarynyń aldynda sapaly jáne qoljetimdi bilim berýdi qamtamasyz etýge baǵyttalǵan kóptegen mindetter tur. Saýyqtyrý lagerleri men qosymsha bilim berý uıymdarynyń sanyn ulǵaıtý, sondaı-aq áleýetti jańa mamandyqtar ashý boıynsha jumys júrgiziletin bolady.








Joǵary qaraı