Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bıyl bir vıtse-mınıstr, 13 ákim jáne orynbasarlary jemqorlyq kúdigimen ustaldy

2021 jyldyń 9 jeltoqsan 2021 11:15

NUR-SULTAN. QazAqparat – Bıyl elimizde 1,5 myńnan astam jemqorlyq qylmysy tirkelip, 1280 adam áshkerelendi. Bul týraly QR Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov OKQ-de ótken baspasóz máslıhatynda málim etti, dep habarlaıdy QazAqparat tilshisi.

«Bıyl 11 aıdyń qorytyndysy boıynsha elimizde 1576 sybaılas jemqorlyq qylmysy tirkeldi. Eń kóbi 3 megopolıste tirkelip otyr, olar - Almaty, Nur-Sultan jáne Shymkent qalasy. Sondaı-aq, Túrkistan, ShQO jáne Jambyl oblystary da bar. Al jemqorlyq jıi jasalatyn salalarǵa kelsek, ol aldymen aýyl sharýashylyǵy, bilim, turmystyq-kommýnaldyq sharýashylyq, áleýmettik qamtamasyz etý jáne densaýlyq saqtaý. Sybaılas jemqorlyq jasady degen kúdikpen 1280 adam áshkerelendi, onyń 159-y - ártúrli deńgeıdegi basshylar», - dedi Marat Ahmetjanov.

Agenttik tóraǵasynyń málimetinshe, bıyl bir vıtse-mınıstr, 13 ákim jáne onyń orynbasarlary, 4 sýdıa jáne 28 oblystyq basqarma basshysy paraqorlyqpen ustaldy.

«Memleket bıýdjetine keltirilgen 20 mlrd teńgeden astam zalal óteldi. Biraq bul qurǵaq sandar shynaıy jaǵdaıdy kórsetpeıdi. Bıyl jemqorlyq isi ótken jylǵa qaraǵanda 34 paıyzǵa azaıyp otyr. Onyń ózindik sebepteri bar. Biz búginde sybaılas jemqorlyqpen kúreste úshbýyndy jumys júıesine kóshtik. Qazir sybaılas jemqorlyq isi boıynsha kúdiktige qatysty barlyq protsesýaldy sheshimder prokýrordyń kelisiminsiz zańdy kúshine enbeıdi. Tergeýdiń alǵashqy kezeńinen bastap, is jabylǵansha birneshe súzgiden ótedi», - deıdi ol.


Joǵary qaraı