Aýa raıy
Astana -18 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Bir toı jasaımyn dep qanshama adamnyń obalyna qalmasyna kim kepil - Baqyt Smaǵul

2020 jyldyń 4 shilde 2020 17:55

KÓKShETAÝ. QazAqparat – Kókshetaýdaǵy «El birligi» qoǵamdyq birlestiginiń tóraǵasy, jýrnalıst Baqyt Smaǵul karantındik sharalardy qatańdatý týraly pikir bildirdi, dep habarlaıdy QazAqparat tilshisi.

«Adamzattyń basyna kelgen bul indettiń beti beri qarar túri joq. Bir-birimen bite qaınasyp, týystyǵy etene tereńge ketken qazaqqa da óziniń qaýip-qaterin tóndirip otyrǵany anyq. Qurban bolǵan adamdardyń qatary kóbeıe túskeni de qatty alańdatyp otyr. El aýmaǵynda karantındik tártiptiń qatańdatylǵan túri engizilmek. Osynyń bári adamdardyń saýlyǵy úshin jasalyp jatyr. Biraq, koronavırýs indetinen ólim-jitim azaımaı otyrǵanda, qazaqtyń toı-domalaǵy da kerisinshe kóbeıe túskeni qynjyltady. Memlekettiń quzyrly organdary tarapynan shekteýler qoıyp jatsa da, buǵan qulaq asyp jatqandardy taǵy kórmeısiń. Másele, qazaqtyń toıyn shekteýde emes, kóp jınalatyn jerde kesel de dendep taraıdy ǵoı. Bir toı jasaımyn dep qanshama adamnyń obalyna qalmasyna kim kepil»,- deıdi Baqyt Smaǵul.

Sonymen qatar, ol toı men birge dinı rásimderge de qatań shekteýler qoıylǵanyn qoldaıtynyn atap ótti.

«Bul dinı rásimder ótkizý barysynda da oryn alady. Bas múftııattan qatań shekteýler qoıyldy. Ázirge kóp adamdar pandemııaǵa júrdim-bardym qaraıtyn sııaqty. Birer kún ǵana aýyryp, arty ólimmen aıaqtalyp jatqan oqıǵalardan sabaq alatyn ýaqyt boldy ǵoı. Menińshe, karantındik tártip kezinde toı jáne basqa rásimderge túbegeıli tyıym salynýy tıis. Mysaly, asty otbasylyq aýqymda berýge bolady degendi, qazaq týystyq uǵymmen túsinedi-aý deımin.

Jalpy, kópshilik orynǵa toptap barýǵa nıet bildirgen adam ózine ǵana emes, búkil otbasyna, mańaıyndaǵylarǵa qaýip tóndiretinin umytpaǵany jón. Mundaı qıyn-qystaý sátte jıyn-toılarǵa, shaǵyn basqosýlarǵa múlde tyıym salynyp, zańdy buzǵandar qatań jaýapkershilikke tartylýy kerek dep esepteımin», - dep túıindedi Baqyt Smaǵul.


Joǵary qaraı