Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Bir otbasyn túgel qyryp tastaǵan Qaraǵandy oblysynyń turǵyny sottaldy

2022 jyldyń 25 mamyr 2022 14:41

QARAǴANDY. QazAqparat – Qaraǵandyda bir otbasynyń úsh adamyn óltirgen azamattyń isi qaraldy. Sot Shet aýdany Aqadyr kentiniń turǵynyn kináli dep tanyp, ómir boıyna bas bostandyǵynan aıyrdy, dep habarlaıdy QazAqparat tilshisi.

Sot isi Qaraǵandy oblysynyń qylmystyq ister jónindegi mamandandyrylǵan aýdanaralyq sotynda qaraldy.

Qylmystyq is materıalyna sáıkes, aıyptalýshy urlyq jasaǵanyn jasyrý maqsatynda otbasynyń úsh múshesin óltirgen.

Tergeý ótken jyldyń 11 tamyzynda sottalýshynyń áriptesiniń garajynan úrlenetin rezeńke qaıyqty urlap ketkenin anyqtady.

Bir kúnnen keıin áriptesiniń áıeli bul jaıtqa onyń qatysy baryna kúdiktenip, polıtsııaǵa habarlaımyn dep qorqytqan.

Sottalýshy urlyǵy úshin qylmystyq jaýapkershilikke tartylýdan qorqyp, pyshaq alyp, áriptesiniń úıine kelgen.

Ol birinshi áriptesiniń áıelin kezdestirip, oǵan pyshaq suqqan. Sosyn qylmysker olardyń qyzyn da óltirgen.

Sodan keıin qaskúnem jatyn bólmege bet alyp, onda otaǵasy uıyqtap jatqanyn baıqaǵan. Onyń dármensizdigin paıdalanyp, ony da óltirgen.

Barlyq faktilerdi eskere otyryp, prokýror sottalýshyny aıyptaýdyń barlyq baptary boıynsha kináli dep tanýdy jáne ony ómir boıyna bas bostandyǵynan aıyrýdy surady.

Sot sottalýshyny kináli dep tapty.

«Sot úkimimen L. aıyptaýdyń barlyq baptary boıynsha kináli dep tanylyp, ómir boıyna sottaldy. Jazanyń alǵashqy 5 jylyn qylmystyq-atqarý júıesiniń tolyq qaýipsiz mekemesinde óteıdi. Іs boıynsha jeńildetetin jáne aýyrlatatyn mán-jaı joq. Sot jaza taǵaıyndaý kezinde jasalǵan qylmystyń aýyrlyǵy men mán-jaıy, úsh adamnyń ólimin, jábirlenýshi taraptyń ustanymyn jáne sottalǵan adamnyń is-áreketke qatynasy, ıaǵnı ókinbegenin eskerdi», - dep habarlady Qaraǵandy oblysy PMK baspasóz qyzmeti.

Sonymen qatar, sot jábirlenýshi taraptyń sottalǵannan 15 000 000 teńge kóleminde moraldyq zııandy tolyq kólemde óndirip alý týraly azamattyq talap aryzyn qanaǵattandyrdy.

Úkim zańdy kúshine engen joq.

Eske sala keteıik, Qaraǵandy oblysynyń polıtseıleri úsh adamnyń ólimine qatysty qylmysty «izin sýytpaı» ashqan bolatyn.


Joǵary qaraı