Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Bir otbasyn órtten qutqarǵan qyzylordalyq polıtseı: Ony erlik dep sanaǵan emespin

2021 jyldyń 5 mamyr 2021 18:26

QYZYLORDA. QazAqparat - Qyzylordalyq polıtseı Darhan Ábdikárimov byltyr kóp qabatty úıde bolǵan órtte bir otbasynyń ómirin saqtap qaldy, dep habarlaıdy QazAqparat tilshisi.

Búginde QR Іshki ister mınıstrligi Kóliktegi polıtsııa departamentiniń Qyzylorda stantsııasyndaǵy jelilik polıtsııa bóliminde qyzmet atqaratyn qyraǵy polıtseı syn sátte syr bergen joq. Qyzyl jalyn qushaǵyna oranǵan páter ishinen otbasy múshelerin syrtqa alyp shyqty. Oqıǵa byltyr 16 qazanda bolǵan.




«Bul sátte men sekildi jigitterdiń barlyǵy da solaı áreket eter edi dep oılaımyn. Ony erlik dep sanaǵan emespin. Oblys ortalyǵyndaǵy ózim turatyn kóp qabatty úıdiń ekinshi qabatyndaǵy páterden janushyra kómek suraǵan áıeldiń daýysyn estigende birden-aq oqıǵa ornyna jettim. Qyzyl jalyn biraz jerdi sharpyp úlgergen eken. Oılanyp turatyn ýaqyt joq. Páterdiń ishinen kirip kettim. Aldymen bir jasar sábıdi syrtqa shyǵaryp úlgerdim. Sol qarbalas sátte júrip baıqaǵanym, tilsiz jaý jýynatyn bólmeden shyqqan eken. Alǵashqy sátte úıdegi úlkender ony óz kúshimen sóndirýge tyrysqan. Degenmen ol barlyq bólmege tarap ketken», - dedi Darhan bizben áńgimesinde.




Mundaı sátte órtpen arpalysqan adam jyldam sheshim qabyldaýy tıis. Darhan qyzyl jalyndy aýyzdyqtaý maqsatynda páter ishindegi elektr jelisin ajyratýǵa tyrysty. Odan keıin tez janatyn jáne jarylý qaýpi zor dúnıelerdi órt ishinen syrtqa shyǵaryp úlgerdi.

«Órtti sóndirý maqsatynda kórshilerdiń barlyǵy atsalysty. Bul qaýip-qaterge toly sátter bolatyn. Sol bir ýaqytta barlyǵymyz bir kisideı jumylyp, bir otbasynyń amandyǵyna sebepshi boldyq», - deıdi ol.

Darhan Ábdikárimov Syrdarııa aýdanyna qarasty S. Seıfýllın aýylynda dúnıege kelgen. Ata-anasy Esenkeldi men Almash perzentiniń osyndaı erekshe qasıetterin árdaıym kópshilikke maqtan etedi. Ol ózi týyp-ósken aýyldaǵy №137 qazaq orta mektebinde bilim aldy. Odan keıin Qorqyt ata atyndaǵy Qyzylorda memlekettik ýnıversıtetiniń qarjy jáne nesıe mamandyǵy boıynsha bilim aldy. Al zańgerlik mamandyqty Shymkent qalasyndaǵy joǵary oqý ornynda syrttaı bitirdi. Óziniń eńbek jolynda 17 jyldan astam ishki ister salasynda tabandy eńbek etip keledi. Tájirıbeli maman búginde QR ІІM Kóliktegi polıtsııa departamentiniń Qyzylorda stansasyndaǵy jelilik polıtsııa bóliminde abyroıly qyzmet atqarýda. Ol jary Manatpen birge otbasynda eki ul, bir qyz tárbıelep otyr.

Tájirıbeli tártip saqshysy Darhan Esenkeldiuly QR ІІM-niń jáne Kóliktegi polıtsııa departamenti basshylyǵynyń «Alǵys hatymen» birneshe márte jáne arnaıy tósbelgisimen marapattalǵan.


Avtor Ádiljan Úmbet
Basty sózder: QR ІІM, Qyzylorda oblysy,
Joǵary qaraı