Aýa raıy
Astana 8 °S
Almaty 11 °S
valıýta baǵamy
USD 421.58
EUR 496.83
RUB 5.53
CNY 62.20

Bir orynǵa 4 adam: «Nur Otan» praımerızi qalaı ótýde

2020 jyldyń 22 qyrkúıek 2020 17:25

NUR-SULTAN. QazAqparat - «Nur Otan»-nyń partııaishilik saılaýynda onlaın-daýys berýge qatysý úshin «Praımerız» aqparattyq júıesine 700 myńǵa jýyq partııa múshesi tirkeldi. Bul týraly QazAqparat tilshisi partııanyń baspasóz qyzmetine silteme jasap habarlaıdy.

Partııa baspasóz qyzmetiniń málimetinshe, «Nur Otan» praımerızine 11 myńǵa jýyq úmitker qatysýda. Elimiz boıynsha orta eseppen bir orynǵa tórt adam úmitker bolyp otyr. Kandıdattardyń 70%-y ózin-ózi usynǵandar, al myńǵa jýyǵy – partııanyń jańa músheleri. 37%-y – áıelder, 29%-y – 35 jasqa deıingi jastar. Qatysýshylardyń ortasha jasy – 43 jas.

7 qyrkúıekten bastap praımerızge qatysýshylar 800 myńnan astam adamdy tikeleı qamtı otyryp, 32 myńnan asa úgit-nasıhat is-sharasyn ótkizdi. 14 qyrkúıekten bastap onlaın-formatta jarııa pikirsaıystar bastalady. Onda qatysýshylar naqty eldi mekenderdiń túıindi máselelerin sheshý jónindegi óz paıymdaryn ortaǵa saldy.





«Elbasy, Partııa Lıderi Nursultan Nazarbaev elimizdegi azamattardy alańdatqan máselelerdi birlesip sheshý úshin ashyq dıalogty qamtamasyz etýdiń mańyzdylyǵyn atap ótti. Halyqpen keńinen talqylaý maqsatynda «Nur Otan» partııasy árbir óńir, qala jáne aýdan boıynsha 216 saılaýaldy baǵdarlamanyń jobalaryn jarııalady. Olardy el Prezıdenti Qasym-Jomart Toqaevtyń Qazaqstan halqyna Joldaýynda qoıylǵan mindetterdi, sondaı-aq, «Halyq únine qulaq asatyn memleket» tujyrymdamasy aıasynda azamattardyń usynystaryn eskere otyryp pysyqtaıdy. Birneshe kúnniń ishinde praımerızge qatysýshylar 8 myńnan asa talap-tilekter men usynys jınady», - dedi partııanyń baspasóz qyzmeti.

Aıta ketsek, «Nur Otan» praımerıziniń basty maqsaty – aldaǵy Májilis pen barlyq deńgeıdegi máslıhattar saılaýyna partııalyq tizimderge engizý úshin qoǵamnyń senimi men qoldaýyna ıe bolǵan bedeldi partııa kóshbasshylaryn anyqtaý.

Sondaı-aq, partııa elektrondyq daýys berýdi uıymdastyrý úshin mobıldi qosymsha men primaries.kz veb-portalynyń múmkindikterin paıdalanýdy josparlap otyr. Ashyqtyqty qamtamasyz etý úshin «bir daýys, bir JSN, bir mobıldi nómir jáne bir IP-adres» qaǵıdaty boıynsha rastaý (verıfıkatsııa) júıesi qoldanyldy.

Kandıdattardyń reıtıngisi bar praımerızdiń qorytyndysy 5 qazanda jarııalanady.








Joǵary qaraı