Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Beıjińde qazaq jazýshysynyń shyǵarmashylyǵyna arnalǵan konferentsııa  ótti - Sheteldegi qazaq tildi BAQ-qa sholý

2021 jyldyń 10 mamyr 2021 09:15

NUR-SULTAN. QazAqparat- «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Beıjińde qazaq jazýshysynyń shyǵarmashylyǵyna arnalǵan konferentsııa ótti - CNR

Beıjińde Qytaı jazýshylar odaǵynyń uıymdastyrýymen qazaq jazýshysy Erkesh Qurmanbekqyzynyń «Arǵymaq asýy» atty romanyn talqylaýǵa arnalǵan konferentsııa ótti, dep habarlaıdy Qytaılyq kazakcnr.com saıty.

Atalǵan BAQ-tyń jazýynsha, konferentsııaǵa Qytaı jazýshylar odaǵy basqarmasynyń hatshysy Chıý Hýaduń jáne basqa da tanymal jazýshylar men ádebıet synshylary qatysyp, «Arǵymaq asýy» romany týraly pikirlerimen bólisken. Sondaı-aq, Erkesh Qurmanbekqyzy BAQ-qa bergen suhbatynda «Arǵymaq asýy» romany 6 jyldyq eńbeginiń jemisi ekenin aıtqan.




«Romanǵa qazaq ultynyń aýyl ómiri, tirshilik daǵdysy arqaý bolǵan. Týyndynyń «Arǵymaq asýy» degen ataýynyń ózi sol aýyldaǵy jaılaýdyń ataýy. Kitap qytaı tilinde jazylǵan. Qazaqsha nusqasy áli shyqqan joq», - deıdi jazýshy Erkesh Qurmanbekqyzy.

Eske sala keteıik, Erkesh Qurmanbekqyzy – QHR Jazýshylar odaǵynyń múshesi, jazýshy, aýdarmashy. Ol ana tilinde de, qytaı tilinde de erkin sóılep, jaza alatyn jazýshy. Qazaqstandyq qalamgerlerden Saıyn Muratbekov, Rahymjan Otarbaev, Nemat Kelimbetovterdiń shyǵarmalaryn jáne Omarǵazy Aıtanuly, Orazqan Ahmetov, Jumabaı Biláluly sekildi Qytaıdaǵy qazaq jazýshylarynyń romandaryn qytaı tilinde sóıletken bilikti aýdarmashy. Erkesh Qurmanbekqyzynyń tól týyndylarynan «Kelmeske ketken qaraker», «Tań atar, kún batar» povester jınaǵy, «Ertis syńǵyry» atty áńgimeler jınaǵy jaryq kórgen.

Mońǵolııa Úndistanǵa 1 mıllıon dollar kóleminde gýmanıtarlyq kómek kórsetedi- KAZNEWS




Mońǵolııa Úkimeti koronavırýs ınfektsııasymen kúres aıasynda Úndistan Respýblıkasyna 1 mıllıon dollar kóleminde gýmanıtarlyq kómek kórsetedi. Bul týraly Mońǵolııa Úkimetiniń baspasóz qyzmeti habarlady, dep jazady Mońǵolııanyń Kaznews aqparattyq portaly.

«Gýmanıtarlyq kómek kórsetý týraly aqparatty Mońǵolııa Premer-mınıstri L.Oıýýn-Erdene Úndistan Respýblıkasynyń Mońǵolııadaǵy Elshisi M.P.Sınghty qabyldaǵan sátte jetkizdi. Buǵan deıin 2021 jyly aqpan aıynda Úndistan Úkimeti Mońǵolııaǵa 150 myń vaktsına jibergen bolatyn. Úndistan men Mońǵolııa 1955 jyly dıplomatııalyq qarym-qatynas ornatqan. Úndi-Mońǵol yntymaqtastyǵy buryn tek dıplomatııalyq saparlarmen, jeńildetilgen nesıelermen jáne qarjylyq kómekpen, IT salasyndaǵy yntymaqtastyqtarmen shektelip kelgen. 2015 jyly Úndistan Premer-mınıstri Narendra Modıdyń Ýlaanbaatarǵa sapary aıasynda «Munaı óńdeý óndirisin salý jobasyna mıllıard dollar nesıe» berýge ýaǵdalasqany eki el arasyndaǵy yntymaqtastyqtyń jańa satyǵa kóterilýine túrtki bolyp, taraptar «strategııalyq seriktestik» jarııalaǵan bolatyn», - dep jazdy Kaznews.

Tımýr Bekmambetov Ózbekstanǵa sheteldik iri kınokompanııalardy tartýǵa kómektesedi - «ÓzA» aqparattyq agenttigi




Týrızm jáne sport mınıstri Azız Abdýhakımov kınorejısser ári prodıýser Tımýr Bekmambetovti qabyldady, dep jazady Ózbekstannyń «ÓzA» memlekettik aqparattyq agenttigi.

Atalǵan BAQ-tyń jazýynsha, Mınıstr men Tımýr Bekmambetovtiń kezdesýinde Óbekstandaǵy kınotýrızmdi damytý perspektıvalary týraly áńgimelesip, fılmder, serıaldar jáne basqa da kınoónimder shyǵarýǵa múmkindik beretin eldiń baı tarıhı-mádenı murasy týraly pikir almasqan. Sonaı-aq tanymal rejısser eldiń týrıstik áleýetin, uly batyrlardyń beınesin, tarıhy men tabıǵı kınolokatsııalaryn eskere otyryp, iri kınokompanııalardy tartý boıynsha birqatar bastamalardy usynǵan.




«Kınorejısser Ózbekstanǵa sapary kezinde týrızmdi damytýǵa salynǵan ınvestıtsııa nátıjesi aıqyn baıqalatynyn aıtyp, eldegi týrızm men qonaqjaılyǵyna joǵary baǵa berdi. Ol ózbek halqynyń tózimdiligi men jomarttyǵyn aıta otyryp, fılmderde osy aspektilerdi kórsetý kerektigin jetkizgen. Kezdesýde taraptar, týyndylarda Ábý Raıhan Berýnı, Ábý Álı ıbn Sına, Mırzo Ulyqbek sııaqty uly ǵulamalardyń ómiri men shyǵarmashylyǵy jaıly, Ámir Temir, Mangýberdi syndy tarıhı tulǵalardyń taǵdyry men ólkeniń baı tarıhy baıandalýy jáne Qoja Nasreddın syndy halyq keıipkerleriniń beınesi de nazardan tys qalmaýy kerek ekeni aıtyldy», - dep jazady «ÓzA» aqparat agenttigi.

Túrik kompanııalary Qazaqstanǵa ınvestıtsııa salýdan rekord jańartty - TRT




Ótken jyly koronavırýs epıdemııasyna qaramastan, túrik kompanııalary Qazaqstanǵa 362,4 mıllıon dollar ınvestıtsııalady. Elde túrik kompanııalary osy jyldyń sońyna deıin taǵy 10 ınvestıtsııalyq jobany júzege asyrady, dep habarlaıdy Túrkııa Radıo Televızııa portaly.

«Qazaqstannyń Syrtqy ister mınıstrligi «Qazaqstan men Túrkııanyń ınvestıtsııalyq yntymaqtastyǵyndaǵy jańa tarıhı kezeń» atty esep jarııalady. Esepke sáıkes, 2020 jyly Túrkııadan Qazaqstanǵa salynǵan ınvestıtsııalar rekordty jańartty. 2020 jyly álemdegi tikeleı ınvestıtsııa kólemi Kovıd-19 epıdemııasynyń saldarynan 42 paıyzǵa azaıǵanymen, túrik kompanııalarynyń Qazaqstanǵa salǵan ınvestıtsııalary rekordtyq deńgeıge jetti. Túrik kompanııalary epıdemııaǵa qaramastan ótken jyly Qazaqstanǵa 362,4 mıllıon dollar ınvestıtsııa quıdy jáne eldegi sońǵy 30 jyldaǵy rekordty jańartty. Jyl sońyna deıin taǵy 10 ınvestıtsııalyq joba júzege asyrylatyn Qazaqstanda 2023 jyly túrik kapıtalymen jobalar sanyn eki esege arttyrý kózdelgen», -dep jazady TRT.



Avtor Baqytjol Kákesh
Basty sózder: BAQ, Qandastar,
Joǵary qaraı