Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Beıbit Atamqulov: Energııany únemdeý boıynsha jaýapty mamandar bekitiledi

2021 jyldyń 13 qazan 2021 11:11

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine energııa únemdeý jáne energııa tıimdiligin arttyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasy Memleket basshysynyń 2018 jylǵy Qazaqstan halqyna Joldaýynda berilgen tapsyrmasyna sáıkes ázirlendi. Maqsaty - kásiporyndardyń energııa tıimdiligine qoıylatyn talaptardy kúsheıtý, energııa tıimdiligin arttyrý salasyndaǵy júrgiziletin saıasattyń túpki nátıjesine qol jetkizý.

Qujat energııa únemdeý jáne energııa tıimdiligin arttyrý salasyndaǵy zańnama normalaryn jetildirýge baǵyttalǵan. Jalpy Zańnyń 9 babyna ózgeris engizilip, 2 jańa bappen tolyqtyrý kózdelgen. Negizgi baǵyttar - memlekettik energetıkalyq tizilim, energııa aýdıti, memlekettik baqylaý, bıýdjet sektory jáne óńirlik saıasat.

«Birinshiden, eldegi tutyný kóleminiń úshten biri tıesili iri kásiporyndarda energııa únemdeý máseleleri boıynsha jaýapty tulǵalardy engizý usynylady. Olar energııa menedjerleriniń rólin atqarmaq. Sonymen qatar, energetıkalyq tizilim aıasynda jeke sektor úshin aqparat tizbesin ońtaılandyrý usynylady. Memlekettik sektor úshin avtomattandyrylǵan jylý pýnktimen qamtamasyz etý týraly jáne basqa da aqparatpen tolyqtyrý arqyly keńeıtý kózdeledi. Maqsat - eń ozyq tájirıbelermen ári qaraı salystyrý jáne usynystar daıyndaý», - dedi QR Indýstrııa jáne ınfraqurylymdyq damý mınıstri Beıbit Atamqulov.

Onyń aıtýynsha, energııa aýdıtorlaryna úmitkerlerdi attestattaý fýnktsııalaryn qyzmetkerlerdiń laıyqtylyǵyn rastaıtyn organdarǵa berý usynylady. Bul shara sala sarapshylarynyń kásibı deńgeıin arttyrýǵa yqpal etip, energııa aýdıtiniń sapasyn jaqsartady.

Budan bólek, zań jobasynda energııa aýdıtterin tolyq, maqsatty jáne jedel energııa aýdıti etip jikteý kózdelgen.

«Energııa únemdeý saıasatyn iske asyrýda jergilikti atqarýshy organdar mańyzdy ról atqarady. Búginde jergilikti jerlerde energııa únemdeý sharalaryna baǵyttalǵan baǵdarlamalar joq.

Osyǵan baılanysty jergilikti atqarýshy organdarǵa úsh jylǵa arnalǵan jol kartalaryn qabyldaý jáne iske asyrý quzyretin berý usynylady», - dedi mınıstr.

Beıbit Atamqulovtyń sózine qaraǵanda, energııa únemdeýdiń eleýli áleýeti bar bıýdjet sektoryn retteýdi kúsheıtý jáne bıýdjet shyǵyndaryn azaıtý maqsatynda tıisti quraldar usynyldy.

Osy oraıda:

- Memlekettik mekemelerde energııa únemdeýdi qamtamasyz etetin, sonymen birge energııa tutynatyn jabdyqtar naryǵyn qaıta qurýǵa serpin beretin Energııa tıimdi memlekettik satyp alýdy engizý.

- Energııa tutyný normatıvterin qabyldaý, olardyń saqtalýyna monıtorıng júrgizý, benchmarkıng jáne energııa tıimdilik boıynsha tıisti usynymdar berý.


Joǵary qaraı