Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Berik Ýálı «Samuryq-Qazyna» týraly: Prezıdent Úkimetten jáne Jekeshelendirý jónindegi komıssııadan naqty is-áreketter kútedi

2022 jyldyń 17 qańtar 2022 16:39

NUR-SULTAN. QazAqparat - «Samuryq-Qazyna» men Úkimet arasyndaǵy ózara qatynastardyń sıpatyn ózgertý qajet. Bul týraly QR Prezıdentiniń baspasóz hatshysy Berik Ýálı jelidegi paraqshasynda jazdy.

«Ózderińizge málim, Memleket basshysy Qasym-Jomart Toqaev 11 qańtarda ótken Májilistiń plenarlyq otyrysynda «Samuryq-Qazyna» qorynyń qyzmetin tolyǵymen transformatsııalaý qajet ekenin aıtqan bolatyn.

Qordyń portfeldi kompanııalary – ulttyq ekonomıkanyń júıe quraýshy qurylymdary. Sondyqtan qazir ekonomıkany qurylymdyq jaǵynan qaıta qurý jáne resýrstardy el ıgiligine baǵyttaý jónindegi mindetterdiń oryndalýy qordyń jumysyna baılanysty.

Memleket basshysynyń pikirinshe, Úkimet, eń aldymen, tym kóp basqarý qurylymdaryn qysqartýmen aınalysýy kerek. Sonymen qatar memleket pen halyqtyń múddesine baǵyttalǵan tabystardy arttyrý úshin «Samuryq-Qazyna» men Úkimet arasyndaǵy ózara qatynastardyń sıpatyn ózgertý qajet», - dep jazdy Berik Ýálı.

Ol Qasym-Jomart Toqaev Úkimetten ekonomıkanyń negizgi salalarynda shynaıy básekege negizdelgen orta qalyptastyrýdy jáne qor men ulttyq kompanııalardyń satyp alý júıeleriniń ashyqtyǵyn qamtamasyz etýdi talap etkenin jetkizdi.

«Prezıdenttiń pikirinshe, memleket ekonomıkaǵa kóp aralasa bermeýi kerek jáne osy turǵyda «Samuryq-Qazyna» qorynyń aktıvterin jekeshelendirý isin jandandyrýy qajet.

Osyǵan oraı jekeshelendirý kezinde ashyqtyqty saqtaý mańyzdy. Onsyz ekonomıkany qurylymdyq turǵydan qaıta qurý múmkin emes. Prezıdent Úkimetten jáne Jekeshelendirý jónindegi memlekettik komıssııadan naqty usynystar men is-áreketter kútedi», - dep tolyqtyrdy ol.

Eske salsaq, Parlament Májilisiniń jalpy otyrysynda Memleket basshysy Qasym-Jomart Toqaev «Samuryq-Qazyna» qorynda reformalaý múldem múmkin bolmasa, ondaı qurylymnyń ekonomıkamyzda bolmaǵany jón dep aıtqan bolatyn.



Joǵary qaraı