Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Belgili saıasattanýshy qazaqstandyqtardy vaktsına alýǵa shaqyrdy

2021 jyldyń 14 maýsym 2021 19:10

ALMATY. QazAqparat - Saıasattanýshy, QR Prezıdenti janyndaǵy Ulttyq qoǵamdyq senim keńesiniń múshesi Marat Shıbýtov koronavırýs vaktsınasynyń eki dozasyn aldy, dep habarlaıdy QazAqparat tilshisi.

Saıasattanýshy 2020 jyldyń shilde aıynda koronavırýspen aýyrǵanyn aıtty.

«Men koronavırýs juqtyrǵan kezde bir apta qatty aýyrdym. Qalpyma kelý úshin eki aıǵa jýyq ýaqyt kerek boldy. Fızıkalyq júkteme óte aýyr boldy. Bıyl men vaktsına saldyrdym, 1 mamyrda birinshi komponent, 24 mamyrda ekinshi komponentin aldym. QazVac ekpesin saldyrǵym kelgen, biraq meniń úıimniń janyndaǵy vaktsınatsııa pýnktinde «Sputnik V» ǵana boldy. Sondyqtan sony aldym. Qazir jaǵdaıym jaqsy», - deıdi Marat Shıbýtov.

Sonymen qatar, ol qazir Qazaqstanda, Almatyda tórt vaktsına bar ekenin atap ótti. Olar - «Sputnik V», Hayat-Vax, QazVac jáne CoronaVac.

«Basqa eldermen salystyrǵanda, bul - úlken artyqshylyq jáne múmkindik. Keıbir memlekettiń turǵyndary vaktsına saldyrý úshin basqa elderge barýǵa májbúr, óıtkeni óz elderinde vaktsına alý úshin jarty jylǵa jýyq ýaqyt kútedi. Al, qazaqstandyqtar qazir asyqpaıtyn sııaqty, ekpe saldyrý jumystary saıabyrsyp qaldy. Men 1 mamyrda vaktsına pýnktine barǵanymda uzyn-sonar kezek boldy, biraq 24 mamyrda adam az boldy. Buǵan adamdar jaýapkershilkpen qaraý kerek. Mysalǵa, Izraıldi alaıyq, onda halyqtyń 75% -na vaktsına egildi. Demek, olarda sanıtarlyq shekteýler joq. Eń bastysy, olarda koronavırýsty jappaı juqtyrý tómendedi. Tek jekelegen jaǵdaılar. Qytaıda 9 maýsym kúni 800 mln jýyq adam vaktsınatsııalanǵan. Olar kúnine 16-17 mln turǵynǵa ekpe salady. Bizge de shekteý rejıminen shyǵý úshin adamdarǵa vaktsınatsııa qajet», - deıdi ol.

Onyń aıtýynsha, koronavırýsqa nemquraılyq tanytýǵa bolmaıdy. Bul ólimge ákelýi múmkin.

«Qurmetti Almaty qalasynyń turǵyndary! Sizderge júginip otyrmyn. Karantın alynyp tastalýy úshin jáne burynǵy qalypty ómirimizge oralý úshin ekpe saldyrýymyz qajet. Ujymdyq ımmýnıtetti qalyptastyrý úshin kem degende halyqtyń 70% vaktsınatsııalanýy tıis. Sondyqtan sizderdi vaktsına alýǵa shaqyramyn», - dedi saıasattanýshy.


Joǵary qaraı