Aýa raıy
Astana -14 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

Báıdibek aýdanyndaǵy aýyl mektebine 2 «BILIMBook» taqtasy men 50 kompıýter tabystaldy

2020 jyldyń 23 qarasha 2020 04:00

BÁIDІBEK.QazAqparat – Túrkistan oblysy, Báıdibek aýdanyndaǵy aýyl mektebine 2 «BILIMBook» taqtasy men 50 kompıýter tabystaldy.

Jergilikti kásipker Keńes aýylyndaǵy Ó.Joldasbekov atyndaǵy jalpy orta mektebine jalpy quny 13 mln 400 myń teńge turatyn zamanaýı oqý-qural jabdyqtaryn syıǵa tartty, dep habarlaıdy QazAqparat tilshisi.

Barlyq pánder baǵdarlamasyn qamtyǵan, ınternet baılanysyn qajet etpeıtin zamanaýı qurylǵylar oqýshylarǵa úsh tilde bilim alýǵa múmkindik beredi. Qazir eki «BILIMBook» taqtasy, elý kompıýter, bes prınterden turatyn jabdyqtar mekteptiń 4 oqý kabınetine ornalastyrylyp, aldaǵy ýaqytta oqýshylardyń ıgiligine paıdalanylmaq.

Óńirdegi mektepterdiń ishinde alǵashqy bolyp ornalastyrylyp otyrǵan «BILIMBook» taqtasynyń múmkindigi erekshe. Ulttyq biryńǵaı testileýge daıyndalatyn oqýshylarǵa da bul zamanaýı taqtanyń kómegi tıeri sózsiz.

Mektep ustazdarynyń aıtýynsha, mundaı jabdyqtar tipti respýblıkadaǵy mektepterde de tabyla bermeıdi.

Atap óteıik, kásipker Mels Eshmuratovtyń ıgi isteri munymen shektelmeıdi. Ol jýyrda ǵana aýyl jastaryna arnap quny 15 mln turatyn sport keshenin salyp bergen bolatyn.


Avtor Aınur Aqbaeva
Basty sózder: Bilim, Túrkistan oblysy,
Joǵary qaraı