Aýa raıy
Astana -1 °S
Almaty 8 °S
valıýta baǵamy
USD 421.58
EUR 496.83
RUB 5.53
CNY 62.20

Batys Qazaqstanda kıik atqan turǵyndar sottaldy

2020 jyldyń 6 tamyz 2020 21:10

ORAL. QazAqparat – BQO-nyń Qaztalov aýdanynda kıik atqan Muradym Aıtjanov pen Dáýlet Aıtjanov aýdandyq sot úkimimen sottaldy, dep habarlaıdy QazAqparat tilshisi.

Qaztalov aýdany polıtsııa bólimi bastyǵynyń mindetin atqarýshy, polıtsııa maıory Marlen Qarabaevtyń málim etkenindeı, atalǵan turǵyndar QR QK 337-baby 6-bóligi 2-tarmaǵy jáne 339-baby 2-bóligi 2-tarmaǵyna sáıkes aıypty dep tanyldy.

M.Aıtjanov pen D.Aıtjanov múlikterin tárkileýsiz alty jyl alty aı merzimge bas bostandyǵynan aıyryldy. Sondaı-aq 10 jyl merzimge ańshylyq qyzmetpen aınalysý quqyǵynan aıyryldy.

Sot talqysynda belgili bolǵanyndaı, atalǵan ekeý 12 mamyr kúni saǵat 11.30 shamasynda tirkelmegen, memlekettik nómiri joq «Toyota Land Cruiser-80» markaly avtokóligin paıdalanyp, aldyn ala sóz baılasyp, Qaztalov aýdany Qaztalov aýylyna qarasty Bozaı-2 qystaǵynyń mańyna barǵan.

Sol jerde M.Aıtjanov avtokólikpen kıikterdi qýyp, al D.Aıtjanov zańsyz saqtap júrgen IJ-18 EM-M markaly «92117970» 12 kalıbrli ańshylyq qarýymen 15 kıiktiń tekesin atqan. Sodan keıin 30 múıizdi kesip alyp, kıik ushasyn sol jerge tastap ketken.

Qylmys ústinde Qaztalov aýdany polıtsııa bóliminiń qyzmetkerleriniń qolyna túsken olar memleketke 62,505 mln teńge (15 kıiktiń quny) kóleminde materıaldyq zalal keltirgen.

Sot úkimine sáıkes atalǵan avtokólik tárkilendi, kıik múıizi joıyldy. Sottalýshylardan 62,505 mln teńge memleket paıdasyna óndirildi.

Úkim kúshine engen joq.

Eske sala keteıik, budan buryn BQO-da taǵy bir brakonerdiń kıik múıizimen ustalǵanyn jazǵan bolatynbyz.


Avtor Eljan Eraly
Basty sózder: Batys Qazaqstan oblysy, Brakoner, Sot,
Joǵary qaraı