Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Batys Qazaqstanda karantındik shekteý sharalary kúsheıtiledi

2021 jyldyń 21 qańtar 2021 22:38

ORAL. QazAqparat – Batys Qazaqstan oblysynda karantındik shekteý sharalary kúsheıtiledi, dep habarlaıdy QazAqparat tilshisi.

BQO bas memlekettik sanıtar dárigeri Muhamǵalı Aryspaevtyń qaýlysyna sáıkes 25 qańtardan bastap 7 aqpanǵa deıin mynadaı shekteý sharalary engizildi.

Atap aıtqanda, kóp adamnyń qatysýymen bolatyn túrli is-sharalardy ótkizýge, oıyn-saýyq, mádenıet nysandary jáne basqa kóńil kóteretin oryndardyń, menshik nysanyna qaramastan, kezekshi toptardy qospaǵanda, mektepke deıingi balalar mekemeleriniń qyzmetine tyıym salynady.

Memlekettik organdar men kvazımemlekettik uıymdar qyzmetkerleriniń keminde 80 paıyzy, jeke kásipkerlik qyzmetkerleriniń keminde 50 paıyzy qashyqtan jumys isteýge kóshedi.

Bes jasqa deıingi balalardy, sondaı-aq áleýmettik qashyqtyqty saqtaý arqyly qoǵamdyq tamaqtandyrý oryndarynda as ishý kezin qospaǵanda, qoǵamdyq oryndarda, halyqtyń kelýine, olarǵa qyzmet kórsetýge jáne demalýǵa arnalǵan úı-jaılarda, qoǵamdyq avtokólikterde medıtsınalyq nemese mata maskalaryn kııý mindetti bolyp tabylady.

Halyqqa qyzmet kórsetý ortalyqtary jumys kúnderi saǵat 09.00-den 18.00-ge deıin, senbide 09.00-den 14.00-ge deıin jumys isteıdi. Karantındik sharalardy saqtaý úshin turǵyndar atalmysh ortalyqtarǵa barý úshin Egov.kz, Telegram bot arqyly aldyn ala jazylady.

Kontıngenti 300 oqýshyǵa deıin qalalyq jáne aýyldyq mektepterde balalar dástúrli sıpatta oqıdy. Sondaı-aq ata-analardyń ótinishi boıynsha jalpy bilim beretin mektepterde 1-den 5 synypqa deıin qosa alǵanda, halyqaralyq mektepterde 7 synypqa deıin oqýshylar kezekshi synyptarda bilim alady. Biraq synyptaǵy bala sany 15-ten aspaýy tıis.

Bilim berý mekemesi ákimshiliginiń sheshimi boıynsha sabaqtan tys ýaqytta 5 adamnan aspaıtyn toptarda oqýshylardy jeke oqytýǵa ruqsat beriledi.

Oqý bitiretin synyptar (9, 11 (12 synyptar) úshin aptanyń alty kúni ishinde aralas oqytýǵa: pánderdiń 70 paıyzyn shtattyq rejımde, 30 paıyzyn qashyqtan oqytýǵa (synypta 15 adamnan artyq emes, áleýmettik qashyqtyqty saqtaý, 1 synyp – 1 kabınet qaǵıdaty boıynsha oqytý, bir ýaqytta mektepte jobalyq qýattyń 30 paıyzynan aspaıtyn adamnyń bolýy, sanıtarlyq-dezınfektsııalyq rejımdi, maska rejımin kúsheıtý) bolady.

Tehnıkalyq jáne kásiptik, orta bilimnen keıingi bilim berý uıymdarynda, joǵary jáne joǵary oqý ornynan keıingi bilim berý uıymdarynda 1 kýrs stýdentteri 2020-2021 oqý jylynyń II semestrinen bastap sanıtarlyq-epıdemıologııalyq talaptardy saqtaı otyryp, aralas oqytýǵa kóshiriledi.

Saýnalar, ЅRA ortalyqtar jumys kúnderi saǵat 09.00-den 23.00-ge deıin ashyq bolǵanymen, senbi jáne jeksenbi kúnderi qyzmetterin toqtatady.

Dinı nysandarǵa (meshitter, shirkeýler, soborlar, sınagogalar jáne basqalar) tolymdylyǵyn 30 paıyzdan asyrmaı jáne bir kelýshige keminde 5 sharshy metr sheginde jumys isteýge ruqsat etilgenimen, buqaralyq is-sharalardy (juma namazy, dinı joralar jáne t. b.) ótkizýge tyıym salynady.

Azyq-túlik, azyq-túliktik emes ashyq jáne jabyq bazarlar jumys kúnderi saǵat 09.00-den 17.00-ge deıin, saýda úıleri men ortalyqtary, azyq-túliktik emes dúkender saǵat 10.00-den 23.00-ge deıin jumys isteıdi. Olar senbi jáne jeksenbi kúnderi qyzmetterin toqtatady.

Qoǵamdyq tamaqtandyrý nysandary karantın talaptaryn saqtaı otyryp, saǵat 09.00-den 20.00-ge deıin jumys isteıdi. Al tapsyrys boıynsha tamaqty saǵat 09.00-den 23.00-ge deıin jetkizip jáne shyǵaryp beredi.

Fýdkort qyzmetine tek jetkizip jáne shyǵaryp berýge ruqsat beriledi.

Sulýlyq salondary, shashtarazdar, kosmetologııalyq qyzmet kórsetetin nysandar aldyn ala jazylý boıynsha sanıtarlyq talapqa sáıkes qyzmet kórsetedi. Osylaısha qyzmet kórsetetin sporttyq-saýyqtyrý nysandary senbi jáne jeksenbi kúnderi jumys jasamaıdy.

Aýdandar men oblystar arasynda qatynaıtyn avtobýstar qozǵalysy toqtatylady.

Qoǵamdyq kólikterde sanıtarlyq talaptar qatań saqtalýy tıis.

Oblys turǵyndary juqpaly aýrý belgileri baıqalǵan boıda medıtsınalyq uıymdarǵa barmaı-aq 103 nómiri arqyly jedel járdem shaqyryp, úılerinde qaralýy kerek.

Asa qajettilik bolmasa, jasy 65-ten asqan adamdarǵa turǵylyqty jerinen shyqpaýǵa keńes beriledi.

Jerleý rásimderi kezinde áleýmettik araqashyqtyqty saqtaı otyryp, adamdar sany 20-dan aspaýy qajet.

Eske sala keteıik, Batys Qazaqstanda 60-qa jýyq baladan koronavırýs anyqtaldy.


Joǵary qaraı