Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Batys Qazaqstanda birneshe aýyl tabıǵı gazǵa qosyldy

2022 jyldyń 14 qańtar 2022 17:40

ORAL. QazAqparat – Batys Qazaqstan oblysynda birneshe aýyl tabıǵı gazǵa qosyldy, dep habarlaıdy QazAqparat tilshisi.

Báıterek aýdanynyń Mahambet aýyldyq okrýgine qarasty Pavlov, Gorbýnov eldi mekenderinde «kógildir otyn» alaýy tutandy.

Saltanatty rásimge qatysqan aýdan ákimi Marat Toqjanovtyń atap ótkenindeı, Memleket basshysy Qasym-Jomart Toqaevtyń tapsyrmasyna sáıkes barlyq aýylǵa tabıǵı gaz jáne taza aýyz sý jetkizý udaıy nazarda.

Onyń aıtýynsha, qazirgi kezde aýdan turǵyndarynyń 97,5 paıyzy tabıǵı gazdyń ıgiligin kórip otyr. Aýdanda 68 eldi meken bolsa, osyǵan deıin 51-i «kógildir otynmen» qamtylǵan edi.

Ótken jyly segiz aýylǵa gaz tartý úshin 500 mln teńge bólinip, jumystary bastalǵan bolatyn. Kúni búgin sonyń tórteýi gazǵa qosyldy. Endi Aqsý, Aqbıdaı, Kırsanov, Kishi Shaǵan aýyldary osyndaı ıgilikke qol jetkizbekshi. Sonda gazben qamtý kórsetkishi 99,5 paıyz bolmaqshy.

Qazirgi kezde atalǵan aýyl turǵyndary erekshe qýanysh ústinde.




«Otyn izdeý, ot jaǵyp, kúl shyǵarý mashaqatynan qutyldyq. Endi aýylda balalar oıyn alańy, balabaqsha, bastaýysh mektep ǵımaraty salynsa, tipti ońdy bolar edi», dedi Gorbýnov eldi mekeniniń turǵyny Alfııa Óteýova.

Pavlov aýylynda turatyn Leıla Kolbesenova gazǵa qosa eldi mekenniń «Aqbulaq» baǵdarlamasy aıasynda taza sýmen qamtylǵanyn aıtyp, rızashylyǵyn bildirdi.

Sondaı-aq okrýg ortalyǵy Mahambette aýyldyq mádenıet úıi «Aýyl – el besigi» baǵdarlamasy aıasynda kúrdeli jóndeýden ótti. Osy ǵımarattyń bir bóligi kásipker Almas Amanǵalıevtiń menshiginde edi. Kásipker buryn jataqhana esebinde paıdalanylyp kelgen atalmysh oryndy kitaphana úshin tegin berdi.

Mahambet aýyldyq okrýginiń ákimi Beıbit Amanǵalıevtiń aıtýynsha, aýyl ishinde 7,6 shaqyrym jolǵa asfalt tóselip, «Aqbulaq» baǵdarlamasy aıasynda 9,9 shaqyrym sý qubyry tartylǵan. Eski ǵımarat demeýshiler esebinen jóndelip, 75 oryndyq balabaqsha retinde ashyldy. Sondaı-aq 8 mln teńgege balalar sport alańy salynǵan.

Aıta keteıik, Batys Qazaqstan aýyldarynyń 99,2 paıyzy tabıǵı gazben qamtylǵan. Bul jóninen óńir respýblıkada aldyńǵy qatarda keledi.
Foto:Elvıra Meńdiǵalı


Joǵary qaraı