Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Batys Qazaqstan oblysynda koronavırýs juqtyrǵan 40 naýqas jansaqtaý bóliminde jatyr

2021 jyldyń 17 qyrkúıek 2021 14:45

ORAL. QazAqparat – Batys Qazaqstan oblysynda koronavırýs juqtyrǵan 40 naýqas jansaqtaý bóliminde jatyr, dep habarlaıdy QazAqparat tilshisi.

BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, qazirgi kezde 94 tósektik jansaqtaý bólimsheleri 42,5 paıyzǵa tolǵan.

Arman Qalıbekovtiń sózine qaraǵanda, sonyń ishinde 35 naýqas aýyr, beseýi asa aýyr halde. 5 adam ınvazıvti jasandy tynys alý apparatyna, 25-i ınvazıvti emes osyndaı qurylǵyǵa qosylǵan. 36 naýqastyń 28-i júrek-qan tamyrlary aýrýlaryna, 8-i qant dıabetine shaldyqqan.

Oblys boıynsha pandemııa bastalǵannan beri tirkelgen 36 544 naýqastyń 28 652-si (78,4 paıyzy) jazylyp shyqty. 717, sonyń ishinde bıyl jyl basynan beri 548 adam ómirden ótti.

Sońǵy táýlikte oblystyq jedel járdem stansasyna barlyǵy 836 qońyraý shalynsa, sonyń 105-i KVI-men baılanysty boldy, 29 adam statsıonarǵa jatqyzyldy.

Kúni búgin 1 177 naýqas ambýlatorııada emdelip jatyr. Al 1 059 tósektik 19 ınfektsııalyq statsıonar 39,8 paıyzǵa tolǵan. Aýyrǵandardyń deni vaktsına almaǵan turǵyndar bolyp otyr.

«Búginde qala jáne aýdan emhanalarynda «Spýtnık V», QazVac, Vero Cell vaktsınalary jetkilikti kólemde bar. Osy kezge deıin 214 484 adam vaktsınanyń birinshi, 184 311-i ekinshi komponentimen egildi. Emhanalarda aptanyń barlyq kúnderi tańǵy 08.00-den keshki 20.00-ge deıin egý kabınetteri jumys jasaıdy. Aýdandarda jáne Oraldaǵy temirjol vokzaly janynda kóshpeli medıtsınalyq keshen vaktsına jasaýǵa shyǵyp turady. Osy aptada ortalyq bazar aýdanynda taǵy bir jyljymaly medıtsınalyq keshen shyǵardyq», - dedi A.Qalıbekov.

Eske sala keteıik, budan buryn BQO-da egilýge jatatyn turǵyndardyń 60 paıyzǵa jýyǵy vaktsına saldyrǵanyn, oqýshylar koronavırýs juqtyryp, 84 synyptyń karantınge jabylǵanyn jazǵan bolatynbyz.





Joǵary qaraı