Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Barlyǵy 47 kredıt: Jambylda jarylystan qaza tapqandardyń búkil nesıesi jabyldy

2021 jyldyń 29 qyrkúıek 2021 16:40

TARAZ. QazAqparat – Baızaq aýdanynda bolǵan tótenshe jaǵdaı saldarynan qaza tapqan áskerıler men qutqarýshylardyń otbasyna tıisti barlyq áleýmettik kómek kórsetilip jatyr. Bul týraly Jambyl oblysynyń ákimi Berdibek Saparbaev óńirlik kommýnıkatsııalar qyzmeti alańynda ótken brıfıngte aıtty, dep habarlaıdy QazAqparat tilshisi.

Aımaq basshysy QR Prezıdenti Qasym-Jomart Toqaevtyń tapsyrmasyna sáıkes, marqumdardyń jáne olardyń otbasylarynyń banktegi, qarjy uıymdaryndaǵy bereshekterin óteý boıynsha jumystar júrgizilgenin jetkizdi.

«Úkimet, QR Qarjy naryǵyn retteý jáne damytý agenttigi Jambyl oblysynyń ákimdigimen, banktermen jáne ózge de qarjy uıymdarymen birlesip qaza tapqandar otbasylarynyń boryshtyq júktemesin azaıtý jóninde sharalar qabyldady.

Banktermen, mıkroqarjy uıymdarymen jáne kollektorlyq agenttiktermen júrgizilgen jumys nátıjesinde qaıtys bolǵan qaryz alýshylar men qalǵan jesirlerdiń bereshekterin tolyq kólemde esepten shyǵarý jóninde biryńǵaı sheshim qabyldandy. Búgingi tańda 47 qaryz boıynsha barlyq bereshek óteldi»,- dedi B. Saparbaev.

Budan bólek qarjylaı túrde kómek kórsetilgen.

Atap aıtsaq, Memlekettik áleýmettik saqtandyrý qory jáne respýblıkalyq bıýdjet qarajaty esebinen 14 otbasyna asyraýshysynan aıyrylý boıynsha 76-myńnan 260 myń teńgege deıingi aı saıynǵy járdemaqy taǵaıyndaldy.

Qazan aıynan bastap belgilengen bul járdemaqynyń mólsheri otbasy asyraýyndaǵy adam sanyna qaraı tólenedi.

«Úkimettik qordan qaza tapqandardyń ár otbasyna 10 mıllıon teńgeden qarjylaı kómek kórsetýge jalpy 170 mıllıon teńge somasynda qarajat bólindi. Sol sekildi, oblystyq bıýdjet (árbir otbasyna 5 mıllıon teńge) esebinen materıaldyq kómek kórsetýge 85 mıllıon teńge qaraldy. Bul qarajat tolyq kólemde qaza tapqandardyń shotyna aýdaryldy»,- dedi oblys ákimi.

Qyzmettik mindetin oryndaý kezinde qaza tapqan áskerılerdiń sońǵy atqarǵan laýazymy boıynsha eńbekaqysyna baılanysty bes jyldyq aqshalaı qamtylym mólsherinde muragerlerine birjolǵy ótemaqy tóleý júrgiziletin bolady.





Joǵary qaraı