Aýa raıy
Astana -17 °S
Almaty -14 °S
valıýta baǵamy
USD 421.58
EUR 496.83
RUB 5.53
CNY 62.20

Baqytjan Saǵyntaev: Almatynyń jeke sektory gazben tolyq qamtylady

2020 jyldyń 24 qarasha 2020 11:41

NUR-SULTAN. QazAqparat – Almaty ákimi Baqytjan Saǵyntaev elimizdegi eń iri qalanyń ekologııalyq problemalary qalaı sheshilip jatqanyn aıtyp berdi, dep habarlaıdy QazAqparat tilshisi.

«Almaty qalasynyń ekologııasy – jurtshylyqty alańdatatyn máseleniń biri. Sol sebepti ol máseleni sheshý úshin birqatar shara qabyldanyp jatyr. Eń úlkeni - JEO-2 kómirden gazǵa aýystyrý, ıaǵnı jańǵyrtý. Qazan aıynda osy jobany qarjylandyrý máselesi sheshimin tapty. Osy sheshimniń arqasynda JEO-2-niń shyǵaratyn zııandy qaldyqtary 38 myń tonnadan 6 myń tonnaǵa deıin tómendeıdi. Bul endi Almaty qalasynyń aýasyn tazartýǵa úlken septigin tıgizedi», - dedi Baqytjan Saǵyntaev Úkimet otyrysynda.

Qala ákiminiń aıtýynsha, Almaty qalasynyń mańyndaǵy JEO-3 máselesi boıynsha «Samuryq-Energo» kompanııasy jumys júrgizip jatyr.

Aldaǵy ýaqytta qarjylandyrý máselesi rettelse, bul da qalanyń ekologııasyn jaqsartýǵa septigin tıgizedi.

«Jeke sektordy gazdandyrý deńgeıi - qala boıynsha 99 paıyz. 1800-deı úı áli gazben qamtamasyz etilmegen. Onyń kóbinde magıstraldy qubyrlary joq. Biz «Halyq bankpen» kelistik. Ol bank gazben qamtamasyz etilmegen turǵyndarǵa 0 paıyzben bir jarym jylǵa nesıe beredi. Al turmysy nashar otbasylarǵa ákimdik demeýshilerdi tarta otyryp, bul jumysty aıaqtaımyz», - dedi ol.

Baqytjan Saǵyntaev sonymen qatar Talǵar, Іle, Qarasaı aýdandarynda 80 myńdaı úı áli de gaz qosylmaǵanyn aıtyp ótti.

«Mınıstrliktiń qoldaýymen qarjy bólinse, onda osy Almaty úshin kóp kómek bolar edi. Óıtkeni biz qalany tazalaǵanymen JEO-3 bar, qala shetindegi 80 myń úı bar – báribir shyǵǵaryndylardyń bári qalaǵa kelip jatyr», - dedi ol.

Baqytjan Saǵyntaev Almaty qalasynda 530 myń kólik tirkelgenimen, kúndelikti qalaǵa kiretin kólik 250 myń ekenin aıtady.

Sondyqtan Almatynyń kóliktik strategııasyn damytý maqsatynda negizgi nazar qoǵamdyq kólikke aýystyrý máselesine aýdarylyp jatyr.

Joǵary qaraı