Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

«Baqytty otbasy» baǵdarlamasyna ótinim qabyldaý keıinge shegerildi

2022 jyldyń 24 mamyr 2022 17:01

NUR-SULTAN. QazAqparat – «Baqytty otbasy» turǵyn úı baǵdarlamasyna qatysýǵa ótinim berý ýaqyty shegerildi. Bul týraly «Otbasy bank» AQ-nyń basqarma tóraǵasy Lázzat Ibragımova málim etti, dep habarlaıdy QazAqparat tilshisi.

«Bıyl «Baqytty otbasy» baǵdarlamasy boıynsha azamattardan ótinim qabyldaýdy shamamen 15 maýsymnan bastaǵaly otyrmyz. Buǵan deıin BAQ arqyly atalǵan baǵdarlamaǵa qatysýǵa qujat qabyldaý 1 maýsymnan bastalady dep jarııalaǵanbyz. Degenmen qazirgi ýaqytta turǵyn úı tólemderin sýbsıdııalaý jobasyna basymdyq berilip jatyr. Sondyqtan da osy jobany aıaqtap baryp, «Baqytty otbasy» baǵdarlamasyn bastaýdy jón kórdik»,- dedi Lázzat Ibragımova Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, bıyl «Baqytty otbasy» baǵdarlamasyn júzege asyrýǵa 51 mlrd teńge bólindi.

«Bıylǵy josparǵa sáıkes bul baǵdarlama arqyly 5 myńǵa jýyq otbasy baspanaly bolady. Sondaı-aq osy jyly baǵdarlamaǵa qatysýshylardyń sany artady dep boljap otyrmyz», - deıdi ol.

Eske salaıyq, buǵan deıin «Baqytty otbasy» baǵdarlamasyna qatysýǵa ótinim qabyldaý mamyr aıynda bastalatyny habarlanǵan edi.

Búgingi baspasóz máslıhatynda 3 myń qazaqstandyqqa jaldamaly baspana úshin sýbsıdııa berý maquldanǵany da aıtyldy.

Qazaqstanda barlyǵy 608 myńnan astam azamat baspanaǵa muqtaj.


Joǵary qaraı