Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ázerbaıjanda 100 kılogramnan asa esirtki tárkilendi

2021 jyldyń 12 qazan 2021 20:20

BAKÝ. QazAqparat – Ázerbaıjannyń Memlekettik shekara qyzmetiniń «Gektepe» shekara jasaǵy men Jaǵalaý kúzeti bólimsheleriniń qyzmetkerleri Irannan Ázerbaıjanǵa jiberilgen 102 kılogramm esirtki zatyn, psıhotroptyq jáne kúshti áser etetin dári-dármekti tárkiledi, dep habarlaıdy QazAqparat Trend saıtyna silteme jasap.

Ázerbaıjannyń Memlekettik shekara qyzmetiniń habarlaýynsha, 11 qazan kúni Bılıasývar aýdanynyń osy tektes aýylyna baratyn baǵyttaǵy memlekettik shekara mańaıynda 19 kılogramm esirtki zaty, psıhotroptyq jáne kúshti áser etetin dári-dármek tabylyp, tárkilengen.

Odan bólek, sol kúni saǵat 20:40 shamasynda shekara qyzmeti shekara beketiniń qyzmettik ýchaskesinde Irannan kelgen úsh belgisiz adamnyń Ázerbaıjannyń memlekettik shekarasyn kesip ótkenin anyqtaǵan. Shekara qyzmeti qolynda sport sómkesi bar adamdy ustady, alaıda qalǵan eki kúdikti qolyndaǵylaryn tastap keri qaraı ótip, jasyrynǵan.

Ustalǵan adam Irannyń azamaty Shamhýgaddam Djafar Hasan (1988 jylǵy) bolyp shyqty. Tekserý kezinde shekara qyzmeti onyń sómkesi men túıinshekterden 35 kılogramm esirtki zatyn, psıhotroptyq jáne kúshti áser etetin dári-dármek tárkiledi.

Sonymen qatar 12 qazan kúni Ázerbaıjannyń Shekara qyzmetiniń kúzetshi kemesi teńizden kúmándi túıinshekti baıqady. Tekseris kezinde 47 kılogramm esirtki zaty, psıhotroptyq jáne kúshti áser etetin dári-dármek tabyldy.

Atalǵan faktiler boıynsha jedel-tergeý sharalary júrip jatyr dep habarlandy.

Eske sala keteıik, bul 2021 jyldyń basynan bergi osyndaı birinshi jaǵdaı emes. 20 qyrkúıek kúni Ázerbaıjannyń Bılıasývar kedendik beketinde «hımıkattar men qurǵaq qospalardy» Irannan Latvııaǵa tasymaldaýshy júk kóligi kedendik tekseriske tústi. Qyzmettegi ıt júk kóliginiń tirkemesine qaraı úre bastady, soǵan baılanysty egjeı-tegjaıli tekseris boldy. Nátıjesinde 10 lıtrlik 105 metall qutydan suıyq pishinde geroın saqtalǵan paketter tabyldy. Tárkilengen geroınniń salmaǵy 527,6 kılogramm boldy.

Odan bólek, 14 maýsym kúni Ázerbaıjannyń Memlekettik shekara qyzmeti Iranmen ortaq shekarada 154,5 kılogramm esirtki tárkilengeni týraly málimdedi.


Basty sózder: Ázerbaıjan, Esirtkimen kúres,
Joǵary qaraı