Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Azamattyq bastamalardy qoldaý ortalyǵynyń bıylǵy atqarǵan jumysy saralandy

2021 jyldyń 29 jeltoqsan 2021 16:59

NUR-SULTAN. QazAqparat - «Azamattyq bastamalardy qoldaý ortalyǵy» KeAQ-da QR Aqparat jáne qoǵamdyq damý vıtse-mınıstri Bolat Tilepovtyń tóraǵalyǵymen Dırektorlar keńesiniń kezekti otyrysy ótti, dep habarlaıdy QazAqparat atalmysh vedomostvonyń resmı saıtyna silteme jasap.

Otyrys barysynda Dırektorlar keńesiniń músheleri Ortalyqtyń 2021 jylǵy qyzmetiniń aldyn ala qorytyndylary jónindegi esepti tyńdady.

«Azamattyq bastamalardy qoldaý ortalyǵy» KeAQ Dırektorlar keńesi otyrysynda Ortalyq qyzmetiniń negizgi baǵyttaryna qatysty birqatar máseleler qaraldy. Azamattyq bastamalardy qoldaý ortalyǵynyń Basqarma tóraǵasy Lıma Dıastyń atap ótýinshe, Ortalyq óz jumysynyń barlyq aspektileri boıynsha oń baǵaǵa ıe.

«Sońǵy úsh jyldyń qorytyndylarymen salystyrǵanda, Ortalyq alǵash ret jyldy memleketke zalal keltirmeı aıaqtamaq. Mundaı nátıjelerge qyzmetkerler quramynyń ońtaılandyrylǵanyna qaramastan qol jetkizilgenin atap ótý kerek. Bizdiń ujym kún saıyn granttyq qarjylandyrý tetikterin jetildirýmen aınalysady. Biz ABQO jumysynyń barlyq aspektileri boıynsha keri baılanysqa ıe boldyq. Osy rette biz óz aldymyzǵa protsedýralardy múmkindiginshe yńǵaıly, túsinikti, ádil ári ashyq etý mindetin qoıdyq», - Lıma Dıas dedi.

Shara aıasynda Ortalyqtyń Basqarma tóraǵasy memlekettik emes granttyq qarjylandyrýdy damytý jáne halyqaralyq yntymaqtastyqty nyǵaıtý baǵytynda júrgizilip jatqan jumystardyń qorytyndylaryna da erekshe toqtaldy. Onyń aıtýynsha, jyl boıy osy baǵytta júrgizilgen jumystardyń nátıjesinde Ortalyq aıtarlyqtaı kórsetkishterge qol jetkizgen.




«2021 jyly Ortalyq alǵash ret bıýdjetten tys qarajat esebinen ÚEU-ǵa memlekettik emes granttardy usyna bastady. Jalpy somasy 43,1 mln teńgeni quraıtyn memlekettik emes granttar «Samruk Kazyna Trust» áleýmettik damý qorynyń, «Áleýmettik mańyzdy bastamalardy damytý qory» jeke qorynyń jáne «Medıa Damytý Qory» korporatıvtik qorynyń qoldaýymen berildi. Sonymen qatar, jeltoqsan aıynda 1 mln teńge mólsherindegi shaǵyn granttar esebinen Qazaqstannyń 30 aýyl mektebin damytýǵa baǵyttalǵan granttyq joba óz máresine jetti. Ol elimizdiń muǵalimderi men oqýshylary tarapynan oń baǵasyn alǵan-dy.

Sonymen qatar, bıyl áleýmettik jobalardy qarjylandyrý kózderin ártaraptandyrýdy jeńildetý maqsatynda KEU-ǵa korporatıvtik sektordan demeýshilik kómekti tartý arqyly qoldaý kórsete bastadyq. Osylaısha, áleýmettik bastamalarǵa «Qazaqmys» JShS, ERG Eurasian Group jáne «Sberbank» AQ-dan 13 mln teńge tartylǵan bolatyn», - dep Lıma Dıas málimdedi.

Munymen qosa, Azamattyq bastamalardy qoldaý ortalyǵy aǵymdaǵy jyly jaqyn jáne alys shetelderdegi uıymdarmen yntymaqtastyq ornatty. Osylaısha, Ortalyq basshylyǵy 2021 jyly Ýkraına men Reseı Federatsııasynyń uıymdarymen yntymaqtastyq týraly memorandýmdarǵa qol qoıdy.




Ortalyq basshylyǵy, sondaı-aq, Brıjıt Bardo Qory, Qazaqstandaǵy USAID keńsesi, Qazaqstandaǵy Kanada elshiligi, Qazaqstandaǵy Italııa elshiligi, BAQ máseleleri jónindegi Ázerbaıjan Respýblıkasynyń delegatsııasy, Qazaqstandaǵy EQYU keńsesi, Qazaqstannyń ABA Roli, RF prezıdenttik granttar qory sııaqty halyqaralyq uıymdarmen birqatar kezdesýlerdi ótkizdi. Taraptar qazaqstandyq úkimettik emes sektordy KEU-nyń áleýetin arttyrý, ózara tájirıbe almasý jáne saraptamalyq qoldaý arqyly damytý týraly kelisti. Sonymen qatar, jobalardyń áleýmettik áserin kúsheıtý jáne turaqtylyǵyn qamtamasyz etý maqsatynda atalmysh uıymdarmen birlesip, Ortalyqtyń granttyq jobalaryn qarjylandyrý múmkindigi jeke qarastyrylýda.

«Tutastaı alǵanda, biz óz áleýetimizdi nyǵaıtyp, bıznes-sektor men halyqaralyq uıymdardyń ókilderi sııaqty seriktesterimizdiń jelisin keńeıte aldyq. Kelesi jyly halyqaralyq uıymdarmen birlese júzege asyratyn bastamalarymyzdyń aıasynda ıózara tıimdi yntymaqtastyqty nyǵaıtý baǵytyndaǵy jumysty jalǵastyramyz», - dep túıindedi ol.

Shara sońynda Qoǵamnyń Dırektorlar keńesiniń músheleri strategııalyq mańyzy bar birqatar sheshim qabyldap, aldaǵy 2022 jylǵa josparlardy belgiledi.

Aıta keteıik, Ortalyqtyń 2021 jylǵy jumysynyń qorytyndy nátıjelerine arnalǵan Dırektorlar keńesiniń otyrysy kelesi jyldyń qańtarynda ótkiziledi dep josparlanyp otyr.


Joǵary qaraı