Aýa raıy
Astana 12 °S
Almaty 18 °S
valıýta baǵamy
USD 412.55
EUR 468.66
RUB 5.79
CNY 58.80

Azamattar dári-dármektiń baǵasyn negizsiz kóterý faktilerin áshkereleı alady

2020 jyldyń 9 shilde 2020 15:32

NUR-SULTAN. QazAqparat - Azamattar dári-dármektiń baǵasyn negizsiz kóterý faktilerin áshkereı alady. Bul týraly QR Sybaılas jemqorlyqqa qarsy is-qımyl agenttiginiń Parasattylyq departamentiniń dırektory Ǵanıjan Asanuly aıtty, dep habarlaıdy QazAqparat tilshisi.

«Koronavırýsqa baılanysty qalyptasqan jaǵdaıda dárilik zattarǵa baǵany ádeıi kóterý, sondaı-aq jasandy tapshylyqtyń paıda bolýy, aýrýhanalarda tósek oryndarynyń bolmaýy baıqalady. Osyǵan baılanysty Memleket basshysynyń dári-dármekterdi alypsatarlyq jaǵdaılaryn joıý tapsyrmasyn oryndaý úshin elimizdiń barlyq óńirlerinde jumys toptary jumys isteýde. Olardyń quramyna sybaılas jemqorlyqqa qarsy qyzmetiniń qyzmetkerleri, «Adaldyq alańy» jobalyq keńseleriniń, arnaıy monıtorıng toptardyń músheleri, sondaı-aq basqa da múddeli memlekettik organdardyń ókilderi kirdi», - dedi ol agenttiktiń baspasóz alańynda ótken brıfıng barysynda.

Onyń atap ótýinshe, atalǵan jumys toptary áleýmettik jelilerge jáne saıttarǵa tapshy dárilik zattardy satý jáne baǵany kóterý boıynsha habarlamalarǵa, aýrýhanalarda halyq úshin jasalǵan jaǵdaılarǵa qoǵamdyq monıtorıng júrgizip otyr. Sondaı-aq dári-dármekti saqtaý jáne satý oryndaryn da tekserip jatyr.

«Halyqpen keri baılanys ornatý úshin 8 702 000 2494 WhatsApp nómeri jumys isteıdi. Oǵan azamattar dári-dármektiń baǵasyn kóterý faktileri boıynsha foto jáne beıne materıaldardy jibere alady. Atalǵan nómirden bólek óńirlerde «Adaldyq alańy» jobalyq keńse basshylarynyń telefondary jumys isteıdi. Bul nómerlerdiń barlyǵy táýligine 24 saǵat aptasyna 7 kún qaǵıdaty boıynsha áreket etedi. Azamattardyń joldaǵan árbir faktisi tekserilip, buzýshylyq anyqtalǵan jaǵdaıda tıisti sharalar qabyldanatyn bolady», - dedi Ǵanıjan Asanuly.


Joǵary qaraı