«Aıntraht» Eýropa lıgasynyń jeńimpazy boldy

NUR-SULTAN. QazAqparat - UEFA Eýropa lıgasynyń jeńimpazy anyqtaldy, dep habarlaıdy QazAqparat tilshisi.

Atalǵan týrnırdiń fınalynda Germanııanyń «Aıntraht» jáne Shotlandııanyń «Glazgo Reındjers» komandalary kezdesti.

Komandalar bir-birine tegeýrindi qarsylyq kórsetti. Ekeýiniń de gol soǵatyn kóptegen múmkindigi boldy. Degenmen birinshi kezeńde tablodaǵy esep ózgergen joq.

Ekinshi kezeńde de komandalar esepti ózgertýge bar kúshin saldy. Nátıjesinde 57-mınýtta shotlandııalyq klýbtan Djo Arıbo kózdegen nysanadan múlt ketken joq. Al 70-mınýtta «Aıntraht» shabýylshysy Rafael Borre tarazy basyn teńestirdi.

Negizgi kezeń 1:1 esebimen teń aıaqtaldy. Oıyn sońyndaǵy penaltı tebýde «Aıntraht» mergendik tanytty. Osylaısha germanııalyq klýb Eýropa lıgasynyń jeńimpazy boldy.

Aıta ketsek, «Aıntraht» budan buryn 1980 jyly UEFA kýbogynyń jeńimpazy atanǵan edi.

Eske salsaq, budan buryn fýtboldan Qazaqstan kýbogynyń jerebesi tartyldy .