Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Aýyl mektepteriniń túlekteri úshin JOO-ǵa kvota 35% deıin ulǵaıtylady - BǴM

2022 jyldyń 18 mamyr 2022 17:52

NUR-SULTAN. QazAqparat – Bilim jáne ǵylym mınıstri Ashat Aımaǵambetovtyń aıtýynsha, zertteýlerdiń kóbi daryndy oqýshylardy ǵana emes, sonymen qatar áleýmettik osal toptaǵy balalardy da qoldaýdyń mańyzdylyǵyn kórsetedi. Vedomstvo basshysy bul jerde merıtokratııa men ınklıýzıvtiliktiń tepe-teńdigin saqtaý mańyzdy ekenine nazar aýdarady. Mınıstr áleýmettik jelidegi paraqshasynda mektepterde, kolledjder men ýnıversıtetterde osy teńestirýge qatysty engizilip jatqan ózgerister týraly jazdy, dep habarlaıdy QazAqparat.

Mınıstrdiń aıtýynsha, osy jyly aýyl mektepteri túlekteriniń joǵary bilim alýǵa qoljetimdiligin qamtamasyz etý maqsatynda olardyń kvotasy 35 paıyzǵa deıin ulǵaıtylady.

Al, áleýmettik osal otbasy balalary úshin mamandandyrylǵan mektepterge túsýge jańa 15%-dyq kvota engizý týraly sheshim qabyldanǵan.

«Endi osyndaı otbasylardan shyqqan 2 myńnan astam bala jańa kvota boıynsha BIL, Daryn jáne basqa mektepterge oqýǵa túse alady», - dep jazady mınıstr.

Vedomstvo basshysy 15%-dyń kóp emestigin alǵa tartyp, sol sebepti mamandandyrylǵan oqý oryndary basshylaryna mektepterdiń nátıjelerine áser etedi dep alańdaýǵa negiz joqtyǵyn aıtady. Mınıstr joǵary akademııalyq jetistikteri bar balalarmen qarym-qatynas bul oqýshylarǵa oń áser etetinine jáne olardyń tez beıimdelip, bilimderin shyńdaýyna septigin tıgizetinine senim bildiredi.

«Biz «Sandyq (tsıfrly) repetıtor» jobasyn engizip jatyrmyz. Jańashyldyqtyń maqsaty - áleýmettik osal otbasydan shyqqan balalarǵa (500 myńǵa jýyq oqýshy) apta saıyn tegin matematıka, til nemese jaratylystaný pánderinen keminde 3 qosymsha sabaq alý múmkindigin berý», - deıdi Ashat Aımaǵambetov.

Mınıstrlik «Qazaqstan halqy» qorynan osy jobany qarjylandyrýǵa qoldaý kórsetýdi suraǵan.

Al, kolledjder boıynsha bıyl respýblıkalyq bıýdjetten qosymsha 45 myń grant bólindi. Olar bilimmen qamtýdy arttyrý maqsatynda ákimdikter men jergilikti kolledjderge beriledi. Ashat Aımaǵambetov ákimdikterdiń qarjylandyrýy jetkiliksiz bolǵandyqtan, kóbi kolledjde oqýǵa tegin grant ala almaǵany jasyryn emestigin jetkizedi.

Ýnıversıtetterge kelsek, byltyr granttardy bólý kezinde alǵash ret áleýmettik osal otbasydan shyqqan balalarǵa ýnıversıtette oqýǵa kvota engizilgen. Mınıstrdiń aıtýynsha, osynyń arqasynda endi memleket esebinen bilim alý múmkindigi aıtarlyqtaı artty.

«Osy stýdentterdiń birinshi oqý jylynyń nátıjesin jáne osyndaı sheshimniń tıimdiligin kórip, endi bolashaqta bul kvotany odan ári ulǵaıtyp, jalpy grant sanynyń 15%-yna jetkizýdi jón kórdik. Demek, halyqtyń áleýmettik osal toptarynan shyqqan taǵy 5 myń bala memlekettik bıýdjetke oqýǵa múmkindik alady», - dep jazady mınıstr.

Eske salsaq, bıyl ulttyq biryńǵaı testileý kezinde erekshe qajettiligi bar mektep túlekterine qosymsha 40 mınýt ýaqyt beriledi.


Joǵary qaraı