Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Atyraýda Ulttyq ulannyń sarbazdary turǵyn úıdegi órtti sóndirdi

2021 jyldyń 13 qyrkúıek 2021 01:30

ATYRAÝ. QazAqparat – Atyraýda Ulttyq ulannyń sarbazdary turǵyn úıdegi órtti sóndirdi, dep habarlaıdy QazAqparat.

Ulttyq ulannyń «Batys» óńirlik qolbasshylyǵynyń baspasóz qyzmetiniń aqparatyna qaraǵanda, turǵyn úıdegi órt 11 qyrkúıekte saǵat 19:40 shamasynda bolǵan.

«Atyraýdaǵy №5546 áskerı bóliminiń patrýldeý jasaǵynyń bastyǵy Nursultan Abdýllaev, qatardaǵy sarbazdar Mıhaıl Lopatın men Nursultan Sársen turǵyn úılerdiń birinen shyqqan qara tútindi baıqaǵan. Olar oqıǵa ornyna jedel jetip, avtokólik salonynyń elementterine uqsas belgisiz zattardyń janǵanyn anyqtady. Jalyn jaqyn mańdaǵy jeke turǵyn úıge taralǵan. Osy kezde olarǵa kómek surap aıqaılaǵan qart áıel júgingen. Ulttyq Ulan sarbazdary ózderine tóngen qaýipke qaramastan, qolda bar quraldarmen órtti jedel sóndirdi. Oqys oqıǵadan eshkim zardap shekken joq» -dep habarlady «Batys» óńirlik qolbasshylyǵy baspasóz qyzmetiniń jetekshisi, podpolkovnık Erbolat Sultanov.

Órtengen turǵyn úıdiń ıesi Saǵı Ájibaeva sarbazdarǵa alǵys aıtyp, №5546 áskerı bóliminiń komandırine hat joldady.

«Úıde jalǵyz edim. Órt qaýpi tóngende, ony sóndiretindeı shamam bolmady. Ulttyq ulannyń sarbazdary qol ushyn sozbaǵanda, úıimnen aıyrylatyn edim. Olardyń qınalǵan sátte kórsetken kómegine rızamyn. Qınalǵan janǵa qorǵan bolatyn sarbazdarymyz aman-esen júrsin» - dep alǵysyn bildirdi Saǵı Ájibaeva.

Eske sala ketelik, buǵan deıin Atyraýda ulttyq Ulannyń áskerı qyzmetshisi qarııany órtten qutqarǵanyn https://www.inform.kz/qz/atyrauda-ulttyk-ulannyn-askeri-kyzmetshisi-kariyany-ortten-kutkardy_a3820031 jazǵan bolatynbyz.


Avtor Bek Mustafa
Basty sózder: Atyraý oblysy, Ásker,
Joǵary qaraı