Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Atyraýda Naýryz merekesine bólingen 116 mln teńgege qatysty jaǵdaı túsindirildi

2021 jyldyń 14 qazan 2021 18:00

ATYRAÝ. QazAqparat – Atyraýda Naýryz merekesine bir derekkózden 116 mln teńge bólingen. Osyǵan baılanysty tıisti mekeme basshylary túsinik berdi, dep habarlaıdy QazAqparat Óńirlik kommýnıkatsııalar qyzmetine silteme jasap.

Mahambet atyndaǵy Atyraý oblystyq akademııalyq qazaq drama teatrynyń dırektory Berik Jámenovtiń aıtýynsha, Naýryz merekesine baılanysty jarııalanǵan konkýrs boıynsha memlekettik satyp alýǵa jaýapty maman qatelik jibergen.

«10 naýryz kúni teatr «QR Memlekettik satyp alý týraly» zańyna sáıkes, bir derekkózden memlekettik satyp alý tásili negizinde úsh mekemeniń baǵa usynystaryn suratty. Eń tómen baǵa usynǵan «ARSEN» jeke kásipkerligimen 116 300 000 teńgege kelisimshart jasadyq. Atqarylǵan jumystardyń qarajaty qabyldaý aktisine sáıkes, is-sharalar ótkizilgen naýryz, mamyr, maýsym aılarynda banktegi esepshot arqyly tólendi. Mekemeniń qarjylyq jáne normatıvtik quqyqtyq aktilerine taldaý jasaý barysynda bul konkýrstyń ashyq portalda kórinis tappaǵanyn anyqtadym. Osyǵan oraı, jaýapty mamanǵa tártiptik jaza qoldandym» -deıdi Berik Jámenov.

Onyń aıtýynsha, jaýapty maman kemshilikti joıý maqsatynda atqarylǵan, qarjysy tólengen jumystardy ashyq portalǵa bir derekkózden memlekettik satyp alý tásili negizinde jarııalaǵan. Bul týraly teatr dırektoryna eskertpegen. Kelisimshartta kórsetilgen 116 300 000 teńgeniń qazirge deıin 54 850 000 teńgesi ıgerilgen.

Al, oblystyq mádenıet basqarmasynyń basshysy Aqylbek Rysqalıevtyń deregine súıensek, bul máselege baılanysty arnaıy jumys toby qurylǵan.

«Kez kelgen memlekettik organnyń is-sharalar josparyna sáıkes, jyl basynda oblystyq máslıhattyń sheshimimen qajetti qarajat qarastyrylyp, bólinedi. Budan keıingi protsedýralardyń zań sheńberinde oryndalýy, qarajattyń tıimdi jumsalýy árbir mekemeniń jeke jaýapkershiliginde, ıaǵnı kelisimshart sheńberindegi qarajatty maqsatyna qaraı ıgerý Mahambet atyndaǵy oblystyq akademııalyq qazaq drama teatrynyń quziretine jatady. Atalǵan máseleniń mán-jaıyn anyqtaý úshin arnaıy jumys toby quryldy. Qazir zerdeleý jumystary júrgizilýde» -dedi Aqylbek Rysqalıev.

Eske sala ketelik, buǵan deıin Atyraý oblysynda bilim basqarmasynyń eks-sheneýnigi sottalǵanyn habarlaǵan edik.


Avtor Bek Mustafa
Basty sózder: Atyraý oblysy, Mádenıet, Qarjy,
Joǵary qaraı