Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Atyraý oblysynyń ákimi vaktsınatsııany jandandyrýdy tapsyrdy

2021 jyldyń 22 maýsym 2021 15:21

ATYRAÝ. QazAqparat – Atyraý oblysynyń ákimi Mahambet Dosmuhambetov óńirde vaktsınalaý qarqynyn kúsheıtýdi tapsyrdy, dep habarlaıdy QazAqparat.

Aımaq ákiminiń tóraǵalyǵymen ótken keńeste vaktsınalaý, sondaı-aq monıtorıngilik toptardyń jumysy qaraldy.

Oblystyq Densaýlyq saqtaý basqarmasynyń basshysy Ashan Baıdýálıevtiń aıtýynsha, óńirde koronavırýs ınfektsııasyna qarsy vaktsınanyń І komponentin 71 myń adam alǵan. Al ІІ komponentti ektirgender sany 32 myńǵa jetken.

«Aqpan aıynnyń basynan beri oblysqa 111 200 doza vaktsına jetkizildi. Onyń ishinde 92 700 doza «Spýtnık-V», 2000 doza «Qazvac», 9500 doza «Hayat-Vax» jáne 7000 doza «Corona Vac» vaktsınasy bar. Ekpe salý úshin 31 statsıonarlyq, 10 jyljymaly beket ashyldy. Qazir Teńiz ken ornynda - 2, «Atyraý», «Baızar» jáne «Dına» saýda ortalyqtarynda - 3, qala men aýdandyq emhanalarda 36 beket jumys istep tur», - deıdi Ashan Baıdýálıev.

Onyń málimetine súıensek, Teńiz ken ornynda vaktsınany ıgerý kórsetkishi qala men aýdandardan 6 ese joǵary bolǵan.

Óńirde vaktsınany kóp alǵandardyń kóshin quqyq qorǵaý organdarynyń qyzmetkerleri bastap tur. Qazir bul salada egý kórsetkishi 154% qurap otyr. Eń tómengi kórsetkish sozylmaly aýrýlary bar naýqastar arasynda – 2,7%, stýdentter – 6,3% jáne pedagogter – 35,2%.

Al, oblystyq Sanıtarııalyq-epıdemıologııalyq baqylaý departamentiniń basshysy Mádenıet Tanaýovtyń dereginshe, óńirde 64 mobıldi top qurylyp, karantındik sharalardyń saqtalýyna monıtorıng júrgizildi.

«Bıylǵy jyl basynan 21 maýsymǵa deıin 9761 reıdtik tekseris ótkizilip, 40 469 nysan qamtyldy. Monıtorıngilik toptar 432 buzýshylyq anyqtady. Shaǵyn jáne orta bıznes nysandary men jeke tulǵalarǵa 42 mln 154 myń 359 teńgeni quraǵan 312 aıyppul salyndy», - deıdi Mádenıet Tanaýov.

Oblys ákimi Mahambet Dosmuhambetov jaýapty laýazym ıelerine óńirdegi shekteýlerdiń oryndalýyn qadaǵalaýshy monıtorıngilik toptardyń jumysyn kúsheıtýdi tapsyrdy.

«Óńirdegi karantıntik shekteýler jalǵasýda. Ahýal turaqtaldy dep aıtýǵa áli erte. Qaýipti vırýstyń taralýyn tejeýdiń bir tetigi – jappaı vaktsınatsııa jumystaryn jandandyrý», - dedi oblys M.Dosmuhambetov.

Atyraý oblysynda koronavırýsqa qarsy vaktsına alǵandarǵa syılyq beriletinin buǵan deıin jazǵan bolatynbyz.


Joǵary qaraı