Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atyraý oblysynda «Jasyl el» eńbek jasaǵyna 138 mln teńge bólindi

2022 jyldyń 20 mamyr 2022 05:47

ATYRAÝ. QazAqparat – Oblystyq ishki saıasat basqarmasy basshysynyń orynbasary Altynbek Ahmetovtiń aıtýynsha, «Jasyl el» jastar eńbek jasaǵy jobasyn iske asyrý boıynsha jeńimpaz atanǵan «Jeti jarǵy» qoǵamdyq qorymen kelisimshart jasaldy, dep habarlaıdy QazAqparat tilshisi.

«Bıyl memlekettik áleýmettik tapsyrys sheńberinde «Jasyl el» jastar eńbek jasaǵy jobasyna 1 756 jasty jumysqa tartý kózdelip otyr. Olardy kógaldandyrý, abattandyrý jáne qurylys baǵyttary boıynsha ýaqytsha maýsymdyq jumysqa tartý maqsatynda jergilikti bıýdjetten 138 mln 700 myń teńge bólindi. «Jasyl el» jobasyna tartylǵan jastarǵa 65 000 teńgeden eńbekaqy tólenedi. Arnaýly logotıpi bar kıim (fýtbolka, beısbolka, kúrteshe) jabdyqtarymen qamtamasyz etiledi», - deıdi Altynbek Ahmetov.

Qazir eńbek jasaǵyna qatysýǵa ynta bildirgen 945 jas tirkelgen. Onyń ishinde, Atyraý qalasynan - 95, Qyzylqoǵa aýdanynan - 305, Qurmanǵazydan - 73, Jylyoıdan - 38, Maqattan - 116, Mahambetten - 76, Inderden - 40, Isataı aýdanynan - 232 jas bar.

«Bul jobaǵa Atyraý oblysyndaǵy joǵary oqý oryndary, tehnıkalyq jáne kásiptik bilim berý kolledjderiniń stýdentteri, jumyssyz jáne NEET sanatyndaǵy, qala mańyndaǵy, aýdandardaǵy eldi mekenderde turatyn jastar qamtylady. Eńbek jasaǵynyń jumys merzimi 1 maýsymnan 31 tamyzǵa deıin jalǵasady. Kvota tolyq qamtylǵannan keıin 16-29 jas aralyǵyndaǵy 300 jas qurylys jumystaryna, ózgesi kógaldandyrý jáne tazalyq jumystaryna bólinedi. Ár jas tek 1 aı jumys isteıdi. Máselen, 18 jasqa deıingi jastarǵa - 36 saǵat, 18 jastan asqandarǵa - 40 saǵat jumys isteýine ruqsat beriledi. Bizdiń maqsatymyz – jastardy qoqys jınaýǵa emes, tabıǵatqa janashyrlyq tanytýǵa úıretý», - deıdi «Jeti jarǵy» qoǵamdyq qorynyń dırektory Abylaı Qurmetuly.

Aıtýynsha, joba aıasynda 1000 jemis kóshetin egý, Jaıyq ózeniniń jaǵalaýyn qoqystardan tazalaý jáne balalar oıyn alańdaryn qalpyna keltirý syndy aktsııalar men senbilikter uıymdastyrý josparlanyp otyr.

Eske sala ketelik, buǵan deıin Atyraý oblysynda jastar saıasaty máselelerine 224 mln teńge bólingenin habarlaǵan edik.


Joǵary qaraı