Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atyraý oblysy ákiminiń burynǵy birinshi orynbasary 10 jylǵa sottaldy

2022 jyldyń 17 mamyr 2022 13:16

ATYRAÝ. QazAqparat – Atyraý oblysy ákiminiń burynǵy birinshi orynbasary 10 jylǵa sottaldy, dep habarlaıdy QazAqparat.

Búgin Atyraý oblysynyń qylmystyq ister jónindegi mamandandyrylǵan aýdanaralyq sotynda oblys ákiminiń burynǵy birinshi orynbasary Nurlan Taýbaev pen oblystyq qurylys basqarmasynyń basshysy Tımýr Basarovty aıyptaý boıynsha qylmystyq is qaraldy.

«2020 jyldyń shilde aıynda Atyraý oblysynyń ákimdigimen Jylyoı aýdanynyń Qulsary qalasynda aýrýhana salý týraly sheshim qabyldandy. Qurylys jumystaryn «BKK» JShS oryndaǵan. Sottalýshy Nurlan Taýbaev oblys ákiminiń orynbasary bola tura jáne qurylys salasyna jetekshilik ete otyryp, «BKK» JShS dırektorynyń orynbasarynan kelisimshart somasynyń 10% mólsherinde para talap etken. Keıin sottalýshy Tımýr Basarovtnyń (qurylys basqarmasynyń basshysy) qatysýymen para somasy 7%-ǵa, 185 500 000 teńge mólsherinde kelisilgen. Nurlan Taýbaev sottalýshy Tımýr Basarovqa aqsha qarajatyn alyp kelýdi tapsyrǵan. Sodan keıin Tımýr Basarov jábirlenýshiden 185 730 004 teńge (423 900 AQSh dollary jáne 5 000 000 teńge) mólsherinde para alǵan. Para berý barysynda Tımýr Basarov sybaılas jemqorlyqqa qarsy Agenttiktiń qyzmetkerlerimen ustalǵan», -dep habarlady oblystyq sottyń baspasóz qyzmeti.




Sot talqylaýy kezinde kórsetilgen mán-jaılar men sottalýshylardyń kinási sottalýshy Tımýr Basarovtyń kinásin tolyq moıyndaý jaýabymen, jábirlenýshiniń, kýálardyń aıǵaqtarymen, oqıǵa bolǵan jerdi qaraý hattamalarymen, jeke tintýmen, Whatsapp messendjerindegi hat almasýmen, baqylaý kameralarynyń beınejazbasymen, arnaýly jedel izdestirý is-sharasy jáne jasyryn tergeý áreketiniń nátıjelerimen, saraptama qorytyndylarymen óz dálelin tapqan.

«Sot sottalýshy Nurlan Taýbaevty QR Qylmystyq kodeksiniń 24-babynyń 3-bóligi, 366-babynyń 4-bóligimen (memlekettik qyzmetti atqaratyn laýazymdy adamnyń qorqytyp alý jolymen adamdar tobynyń aldyn ala sóz baılasýymen asa iri mólsherde para alýǵa oqtalýy), Tımýr Basarovty Qylmystyq kodekstiń 28-babynyń 5-bóligi, 24-babynyń 3-bóligi, 366-babynyń 4-bóligimen (atalǵan is-áreketterge kómektesý) kináli dep tanydy. Nurlan Taýbaevtyń qabyldaǵan antty buzý arqyly qylmys jasaǵany jazany aýyrlatatyn jaǵdaı retinde tanylyp otyr», -dep málim etti baspasóz qyzmetinen.

Sot úkimimen Nurlan Taýbaevqa 10 (on) jyl bas bostandyǵynan aıyrý jazasy taǵaıyndaldy. Sottalýshy Tımýr Basarovqa jazany aýyrlatatyn mán-jaılar men zań talaptarynyń (jaza 8 jyl 5 aıdan aspaıdy) bolmaýy eskerile otyryp, QR Qylmystyq kodeksiniń 55-babynyń 4-bóligi qoldanylyp, 5 jyl bas bostandyǵynan aıyrý jazasy taǵaıyndaldy.

Eki sottalýshy da ómir boıy memlekettik qyzmette jumys isteý quqyǵynan aıyryldy.

Sot úkimi zańdy kúshine engen joq.

Eske sala ketelik, budan buryn sot úkimimen Atyraý oblysy ákiminiń orynbasary kinásiz dep tanylǵanyn jazǵan edik.


Avtor Bek Mustafa
Basty sózder: Aımaq, Zań, Sot, Atyraý oblysy,
Joǵary qaraı