Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atameken: Kásipkerlerden zalaldy óteýge ótinim qabyldana bastady

2022 jyldyń 21 qańtar 2022 09:56

ALMATY. QazAqparat - «Atameken» ulttyq kásipkerler palatasy kásipkerlerge kelgen zalaldy óteýge InfoKazakhstan.kz platformasynda elektrondy ótinimderdi qabyldaı bastady, dep habarlaıdy QazAqparat tilshisi.

«Atameken» ulttyq kásipkerler palatasynyń málimetinshe, bul shara Úkimet bekitken 2022 jylǵy qańtardaǵy jekelegen óńirlerdegi tártipsizdikter saldarynan shaǵyn jáne orta kásipkerlik sýbektilerine kelgen múliktik zalaldy óteý mehanızmine sáıkes iske asyrylady.

Eske salsaq, zalaldy óteý týraly ótinish ETsQ kómegimen infokazakhstan.kz saıty arqyly beriledi.

Mehanızmge sáıkes zalaldy óteý týraly ótinishterdi óńirlik komıssııalar kúntizbelik 5 kún ishinde qaraıdy.

Ótinish maquldanǵan jaǵdaıda usynylǵan málimetter men qujattar negizinde óńirlik komıssııa aıqyndaıtyn mólsherde qarajat bólý týraly sheshim shyǵarylady.

Qarjy Qazaqstan Respýblıkasynyń bıýdjettik rásimderine sáıkes múlik ıesiniń ótinishinde kórsetilgen aǵymdaǵy nemese jınaq shotyna tıisti sheshim qabyldanǵan kúnnen bastap bir aı ishinde ótinish berýshige aýdarylady dep boljanady.

«Zardap shekken kásipkerlerdiń nazaryna! Zalaldy óteýge ótinish berer aldynda osy siltemege kirip, nusqaýlyqpen tanysýyńyzdy suraımyz, sondaı-aq qajetti qujattardyń tolyqtyǵyna kóz jetkizý kerek. Qujattar toptamasy tolyq usynylmaǵan jaǵdaıda óńirlik komıssııa múliktik zalaldy óteýden bas tartý týraly sheshim shyǵarady. Kásipkerlerge yńǵaıly bolý úshin «Atameken» UKP zalaldy óteý boıynsha is-qımyl algorıtmin daıyndady. Onda zalaldy óteýge ótinish berý qadamdary sıpattalǵan» delingen «Atameken» UKP taratqan habarlamada.


Joǵary qaraı