Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

«Astana rýhyn» jandandyrýymyz kerek - EQYU PA Bas hatshysy

2021 jyldyń 25 aqpan 2021 11:16

NUR-SULTAN. QazAqparat - EQYU Parlament Assambleıasynyń sessııasy ótti. Oǵan Senat Tóraǵasynyń orynbasary Asqar Shákirov bastaǵan QR Parlamentiniń delegatsııasy qatysýda. Bul týraly QazAqparat Senattyń baspasóz qyzmetine silteme jasap habarlaıdy.

Senat Tóraǵasynyń orynbasary Turaqty komıtet otyrysynda sóılegen sózinde EQYU-nyń Astana sammıti sheshimderiniń tarıhı qundylyǵy men mańyzyn atap ótti. Ol sondaı-aq EQYU Syrtqy ister mınıstrleri keńesi qabyldaǵan uıymnyń negizgi tórt ınstıtýtynyń basshysyn taǵaıyndaý týraly sheshimderge qoldaý bildirdi.




«Qazaqstannyń ókili EQYU-nyń Az ulttar isteri jónindegi Joǵarǵy komıssary laýazymyna ıe boldy. Osyǵan deıin TMD jáne Ortalyq Azııa elderiniń ókilderi uıym basshylyǵynyń quramyna saılanbaǵanyn aıta ketken jón. Shilde aıyndaǵy jyl saıynǵy sessııadaǵy saılaý barysynda da geografııalyq teń ókildik qaǵıdaty saqtalady dep úmittenemiz», - dedi Tóraǵa orynbasary.

Asqar Shákirov 10 qańtarda jańa zańnamalyq negizde ótken Qazaqstandaǵy parlamenttik saılaýǵa baıqaýshylar mıssııasyn jibergeni úshin Parlamenttik Assambleıaǵa alǵys aıtty. Ol Turaqty komıtet múshelerin prezıdenttik saıası reformalar toptamasymen jáne Memleket basshysy Qasym-Jomart Toqaevtyń keıingi, atap aıtqanda, saıası partııalardyń Parlamentke ótý shegin 7-den 5%-ǵa deıin tómendetý, sondaı-aq saılaý bıýlletenine «bárine qarsy» tarmaǵyn engizý jónindegi bastamalarymen tanystyrdy.




EQYU PA Bas hatshysy Roberto Montella Qazaqstan delegatsııasy basshysynyń sózine jaýap retinde EQYU-nyń 2010 jylǵy Astana Sammıtiniń nátıjeli qorytyndysyn eskere otyryp: «Biz «Astana rýhyn» jandandyrýymyz kerek», - dep atap ótti.

Forým barysynda Assambleıanyń Jalpy komıtetteriniń (saıası máseleler jáne qaýipsizdik; ekonomıkalyq máseleler, ǵylym, tehnologııa jáne qorshaǵan orta; demokratııa, adam quqyqtary jáne gýmanıtarlyq máseleler boıynsha) otyrystary ótetin bolady.

Osy otyrystar aıasynda EQYU PA-nyń jyl saıynǵy 29-shy sessııasynyń (2021 jylǵy 6-10 shildede) qaraýyna shyǵarylatyn tujyrymdamalyq máseleler boıynsha pikir almasý kózdelip otyr.

Іs-sharalarǵa senatorlar Aqmaral Álnazarova, Ǵumar Dúısembaev jáne Qaırat Qojamjarov qatysýda.


Basty sózder: Senat, Eýropa, Halyqaralyq uıymdar,
Joǵary qaraı