Aýa raıy
Astana -3 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

«Astana Operanyń» segizinshi maýsymy: Teatr qalaı jumys isteıdi

2020 jyldyń 17 qyrkúıek 2020 17:21

NUR-SULTAN. QazAqparat – 18-19 qyrkúıek kúnderi «Astana Operanyń» segizinshi maýsymy «Operalyq klassıkaǵa saıahat» gala-operasymen ashylady. Osy oraıda teatr ujymy qatań sanıtarlyq jaǵdaıda qalaı jumys isteıtinin kórsetti, dep habarlaıdy QazAqparat tilshisi.

Gala-opera teatrdyń Úlken zalynda ótedi, oǵan 50 kórermenniń kelýine ruqsat berilgen. Basqa kórermender teatrdyń YouTube kanalynda kontsertti onlaın tamashalaı alady.

«Teatrǵa 50 kórermennniń kelýine ruqsat berilgenin qýanyshpen habarlaımyz. Munda barlyq sanıtarlyq talaptar men áleýmettik araqashyqtyq saqtalady. Kireberiste dene qyzýy ólshenip, qorǵanys maskasy beriledi. Zal ishinde kórermender shahmat tártibimen otyrǵyzylady. Teatrǵa eki adam birge kelse de, aralarynda eki oryndyq bos turýy tıis. Bul – álem boıynsha maquldanǵan tájirıbe», - dep túsindirdi «Astana Opera» MOBT dırektorynyń orynbasary Aıjan Qurmanǵalıeva.

Onyń aıtýynsha, kórermen sanynyń 50-ge deıin shektelýi baǵa saıasatyna esh áserin tıgizbeıdi.

«Biz karantınge deıingi baǵa saıasatyn saqtap otyrmyz. Barlyq bıletti aldyn ala satylymǵa qoıýǵa tyrysamyz. Árıne, qoıylymdardy onlaın kórsetýdi de jalǵastyramyz. Karantın kezinde de burynǵy qoıylymdardy onlaın túrinde usynǵan edik. Erteń bizdiń ártister TJ jaǵdaıynan keıin alǵash ret kórermendermen qaýyshqaly otyr», - deıdi A. Qurmanǵalıeva.

Gala-operada ulttyq jáne álemdik birneshe spektakl qamtylady. Atap aıtqanda, Ahmet Jubanov pen Latıf Hamıdıdiń «Abaı», Dj. Rossınıdiń «Sevıldik shashtaraz», P. Chaıkovskııdiń «Evgenıı Onegın» operalarynan úzindi kórsetiledi.





«Bul óte qyzyqty format jáne kórermender birneshe qoıylymdy tamashalaı alady. Munda elordanyń kásibı tájirıbeli komandasy óner kórsetedi. Vıdeojobalaý syndy zamanaýı ádister burynǵydaı qatań dekoratsııalardyń ornyn almastyrady. Orkestr oınap jatqanda dekoratsııalar úzdiksiz aýysyp otyrady. Kórermenderdiń barlyq qoıylymdy súısinip tamashalaýy úshin jaǵdaı jasaýǵa tyrysamyz. Bıletterdi satylymǵa shyǵarý úshin buıryq kútip otyrmyz, jaqyn arada 50 bılet qoljetimdi bolady», - dedi A. Qurmanǵalıeva.

Sonymen birge, «Astana Opera» teatrynyń bas dırıjeri Alan Bóribaev gala-operaǵa daıyndyq jumystaryn aıtyp berdi.

«Maýsymnyń ashylýy – ártis úshin árdaıym mereke. Halyqqa arnalǵan mereke. Qazirgi kúrdeli kezeń úlken syn-qater tóndirip otyr. Oǵan da beıimdelýge tyrysyp jatyrmyz. Bizdiń teatr «Operalyq klassıkaǵa saıahat» atty qyzyqty, tartymdy baǵdarlama ázirledi. Onda bizdiń negizgi repertýarymyzdan úzindiler kórsetiledi. Árıne, uly aqyn Abaıdyń 175 jyldyǵyna arnap, «Abaı» operasyn da oryndaımyz. Munda 3-4 mınýttyq arııany oryndap qana qoımaı, sol obrazdy kórsetý de mańyzdy. Marıo Kavaradossıdiń (Toska operasy – red.) qalaı ǵashyq bolǵanyn kórermenge jetkizý kerek. Árbir arııa – kishigirim qoıylym sekildi. Ol úshin barlyq derlik solısterimiz jumys istep jatyr. Kópten kútken kezdesýge úlken yntamen kirisip kettik. Gala-opera barlyǵynyń kóńilinen shyǵady dep úmittenemin», - dedi Alan Bóribaev.





Maestro sanıtarlyq talaptarǵa baılanysty mýzykanttardyń bir-birinen alshaqtaý otyratynyn, onyń da orkestr jumysyna áser etetinin jetkizdi.

«Sońǵy jaǵdaılarǵa baılanysty barlyq daıyndyq jumystaryn Úlken zalda ótkizip jatyrmyz. Óıtkeni, mýzykanttar bir-birinen alshaq otyrǵan soń, aspaptardyń úni de basqasha estiledi. Barlyǵyna boı úıretý kerek. Árıne, mýzykanttar úshin etalondyq úndi tabý qıyn. Jyldar boıy repertýardan túspegen partııalardyń ózinen jańa dúnıeler baıqaımyz. Buǵan adamnyń ishki ósýi de áser eretinin shyǵar. Jas kezińde Lenskııdi basqasha qabyldaısyń, keıinirek – tipti basqa adam ba dersiń. Osylaısha, ánde, aspap úninde jańa saryndar paıda bolady. Gala-operada bolatyn barlyq operany jaqsy kóremin. Men onda jaı dırıjerlik etip turmaımyn, ár oqıǵany óz basymnan ótkeremin. Ár qoıylymda Lenskıımen birge ólemin, Onegınmen birge júregim jaralanady. Abaımen de birge jan dúnıemdi ashamyn», - dedi Alan Bóribaev.

2020 jyldyń sońy men 2021 jyly jurtshylyqty aıtýly premeralar men ǵalamat kontserttik baǵdarlamalar kútýde. Qazan aıynyń basynda G.Donıtsettıdiń «Don Paskýale» operasynyń premerasy ótedi, jańalyqtar tizbegin V.A.Motsarttyń mýzykasyna kórnekti horeograf I.Kılıannyń qoıylymyndaǵy «Alty bı» eksklıýzıvti baleti jalǵastyrmaq. Odan keıin teatrsúıer qaýym nazaryna kópten kútken premeralar: G.Donıtsettıdiń «Mahabbat sýsyny» operasy jáne T.Qajyǵalıev, R.Gaısın jáne K.Pıno-Kantananyń mýzykasyna Patrık de Bana qoıylymyndaǵy «Dala úni» ulttyq baleti usynylmaq.

Tıbor Kochaktyń mýzykasyna Dıýla Harangozonyń «Aqshaqar men jeti ergejeıli» balettik spektakli barshaǵa kishkentaıynan tanys ertegi jelisimen jańa qyzyqty ınterpretatsııada ónersúıer qaýymǵa jol tartady.

Erkeǵalı Rahmadıevtiń 90 jyldyǵyna oraı, keler jyldyń basty premerasy – «Alpamys» ulttyq operasy kórsetiledi.

Sonymen birge, qyrkúıek aıynda Kúmis ǵasyr baletteri horeografııalyq óneriniń jaýharlary men N.Rımskıı-Korsakovtyń mýzykasyna «Sheherazada» baleti kórermen nazaryna usynylady.




















Avtor Aıjan Serikjanqyzy
Basty sózder: Óner, Mádenıet, Nur-Sultan,
Joǵary qaraı