Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

«Astana Balet» sahnasynda Marıın teatrynyń solısteri óner kórsetedi

2021 jyldyń 18 qańtar 2021 12:22

NUR-SULTAN. QazAqparat - 29 jáne 30 qańtarda «Astana Balet» teatrynda álemdegi eń tanymal baletterdiń biri - P.Chaıkovskıı mýzykasyna Vasılıı Vaınonen qoıǵan «Shertkish» kórsetiletin bolady, dep habarlaıdy atalǵan óner ordasynyń baspasóz qyzmeti.

Birinshi kúni «Astana Balet» sahnasynda Mashenka men Shertkishtiń partııasyn Marıın teatrynyń ártisteri – prıma-balerına Oksana Skorık pen solıst Evgenıı Konovalov oryndap shyǵady. Ekinshi kúni, ıaǵnı, 30-qańtarda basty partııalardy «Astana Balettiń» jetekshi solıstteri Tatıana Ten men Súndet Sultanov oryndaıdy.

Oksana Skorık klassıkalyq muranyń altyn qoryna jatatyn kóptegen partııalardy oryndap kelgen. Onyń aýqymdy repertýarynda Hans van Manen, A.Ratmanskıı, Ý.MakGregor jáne ózge de zamanaýı horeoraftardyń týyndylary da bar. Kóptegen halyqaralyq konkýrstar men syılyqtardyń laýreaty Oksana Skorık Perm horeografııa ýchılıesin 2007 jyly aıaqtap, sol jyly Marıın teatrynyń trýppasyna qabyldanyp, 2015 jyly prıma-balerına mártebesine ıe boldy. Vaganova atyndaǵy Orys baleti akademııasynyń túlegi Evgenıı Konovalov Marıın teatrynda 2012 jyldan bastap qyzmet etip keledi. Ol da klassıkalyq repertýarmen qatar, XX jáne XXI ǵasyr horeograftarynyń týyndylaryn meńgergen.





Aıta keteıik, «Astana Balet» teatrynda «Shertkishtiń» Vasılıı Vaınonen qoıǵan nusqasy kórsetilmek. Tórt jyl buryn ony astanalyq teatr sahnasyna RF halyq ártisi, QazUHA rektory Altynaı Asylmuratova qoıdy. Vaınonenniń «Shertkish» baleti ertegideı jarqyn ári sıqyrǵa toly spektakl sanalady. Bálkim, balalarǵa arnalǵandyqtan shyǵar. Onyń ústine, óner kórsetetin de balalar. Teatrdyń kásibı ártisterinen bólek, spektaklge Qazaq ulttyq horeografııa akademııasynyń júz alpysqa jýyq stýdenti men oqýshysy qatysady.

Akademııalar men ýchılıelerde tálim alatyn bıshilerdiń óskeleń urpaǵynyń osy tektes baıqaýy álemniń kóptegen teatrlary úshin dástúrge aınalǵan. 1958 jyly Marıın teatry óziniń «Shertkishin» Vaganova atyndaǵy Orys baleti akademııasyna syıǵa tartyp, sol kezden bastap, oqý ornynyń túlekteri bul spektakldi dıplomdyq týyndy retinde oryndap, úlken sahnada óner kórsetip, mol tájirıbe jınaqtaıtyn boldy.




Spektakl negizine qýyrshaq pen tyshqan koroli týraly E. Gofmannyń nemis ertegisiniń A. Dıýma-áke baıandaǵan nusqasy alynyp otyr. Spektakl stsenografııasyn jobalap, jasap shyqqan Jandos Omarov, kostıým sýretshisi – Olga Shaıshmelashvılı. Sımfonııalyq orkestrdiń jetekshisi maestro Arman Orazǵalıeva.






Basty sózder: Mádenıet, Nur-Sultan, Óner,
Joǵary qaraı