Aýa raıy
Astana 7 °S
Almaty 9 °S
valıýta baǵamy
USD 421.58
EUR 496.83
RUB 5.53
CNY 62.20

Ashat Aımaǵambetov ustazdarǵa jeke-jeke hat joldady

2020 jyldyń 9 tamyz 2020 15:15

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov elimizdiń barlyq ustazdaryna arnap hat joldady, dep habarlaıdy QazAqparat tilshisi.

«Qymbatty áriptes! Siz osy qıyn kezeńnen otbasyńyzben birge aman-esen ótip, densaýlyǵyńyzǵa esh qaýip tónbeıtin jaǵdaıda júrsiz degen úmittemin. Sizge pandemııa jaǵdaıyndaǵy baǵa jetpes ustazdyq eńbegińiz úshin, jankeshti jumysyńyz ben kez kelgen ýaqytta balalarymyzǵa tireý bolýǵa degen izgi nıetińiz úshin shyn júrekten alǵysymdy bildiremin. Biz sizben osynaý qıyn ýaqytty eńserý jolyndamyz. Koronavırýs pandemııasy barshamyzdyń turmys-tirshiligimizge áser etti. Súrinbeı ótýge tıis túrli synaqtarǵa toly ýaqyt bastaldy. Osydan jarty jyl buryn mundaıdy tipti elestetpegen edik. Ókinishke oraı, jaqyn adamdarymyzdan aıyrylyp jatyrmyz. Bilim jáne ǵylym júıesi adamı qundylyqtardy dáriptegen, urpaqty tárbıelep, bilim bergen arda azamattarynan – sala ardagerlerinen, bizdiń qymbatty áriptesterimizden aıyrylýda. Týystary men dostary kóz jumǵan áriptesterimniń qaıǵylaryna ortaqtasyp, kóńil aıtamyn. Dál qazirgi qıyn kezeńde jaqyndarymyz ben óz ómirimizdiń, densaýlyǵymyz ben qaýipsizdigimizdiń mańyzy men qadirin túsinip, baǵalaýdy úırenip jatyrmyz. Kez kelgen qıyndyq bizdi shyńdaı túsip, synaqtar jigerimizdi qaırap, rýhymyzdy myqty etedi», - dep jazylǵan mınıstrdiń árbir muǵalimge joldaǵan hatynda.

Osy oraıda ol osynaý qıyn-qystaý kezeńde birge bolýymyz asa mańyzdy ekenin aıta kele: «Bizdiń kúshimiz – bizdiń birligimizde. Biz kez kelgen qıyn mindetterdi birde-bir balany eskerýsiz qaldyrmaı, birlese otyryp sheshe alamyz. Áriptesim, sizge mynany aıtqym keledi! Qazir bizge balalarymyz ben olardyń bolashaǵy úshin jáne tek bilimi ǵana emes, densaýlyǵy men moraldyq jaǵdaıy úshin de úlken jaýapkershilik júktelip otyr. Oqýshylarymyzdyń meılinshe qaýipsiz ári jaıly ortada bilim alýyna qajetti jaǵdaıdyń barlyǵyn jasaýymyz kerek», - dedi.

Osy oraıda ol ustazdardyń tek mektepte ǵana emes, ómirde de kóshbasshy ekenine senim bildirdi.

«Jaǵdaı ornyǵady. Dárigerlermen birigip biz indetti birge jeńemiz, burynǵy ómir birtindep qalpyna kele bastaıdy. Oǵan deıin bárimiz oqýshylar men ata-analarǵa jáne bir-birimizge tireý bola bilýimiz qajet. Alǵys aıtýdyń eshqashan artyqshylyǵy bolmaıdy. Sondyqtan men sizge tórtinshi toqsanda atqarǵan eren eńbegińiz úshin taǵy bir márte raqmetimdi aıtqym keledi. Siz – naǵyz batyrsyz. Sizdiń qýatty qoldaýyńyzdy sezinip otyrmyn. Sol sebepti de erteń balalarymyzdyń bilimin jetildirý jolynda esh kedergi bolmaıtynyna senemin», - dep atap ótti A.Aımaǵambetov.

Osy hat 8 tamyzdan beri elimizdiń barlyq óńirindegi ustazdarǵa elektrondy jeke poshtasyna joldanýda. Hatty alǵan muǵalimder áleýmettik jelilerde Bilim mınıstrine arnap jaýaptaryn jazýda.

Kúlánda Batyrbekova esimdi kásipker hatty tapjylmaı oqyp shyqqanyn atap ótken.

«Keremet! Jaı sózben, adamnyń sanasyna arnalǵan erekshe hat. Ustazdarǵa rahmetin aıta otyryp,osy basymyzǵa túsip jatqan qıynshylyqtan birge shyǵýǵa, shydamdylyq pen sabyrlylyqqa shaqyryp otyr.Pedagog bolmasam da,osy bilim salasynyń janashyry bolyp, ınvestorlardyń qaýymdastyǵynyń tóraıymy retinde,ortaq pochtamyzǵa, jekemenshik mektep pen balabaqshalardyń basshylaryna hatty jiberdim. Halyqtyń barlyǵymen bóliskim keldi. Bólisýge turatyn hat qoı....», - dep jazdy K. Batyrbekova áleýmettik jelide.

Sonymen qatar, taǵy Tolqyn Batyrbaı̆qyzy esimdi ustaz da atalǵan hatqa baılanysty óz pikirin bildirgen.

«Keshe túnde sabaqtaryma daı̆yndalyp otyryp, elektrondy pochtamdy ashyp qalsam, bas ustazymyz Ashat Qanatulynan hat kelip tur. Hatty oqyp kózime jas keldi. Hat sońynda boı̆ymda áldebir kúsh pen jiger paı̆da bolǵandaı̆... Qarapaı̆ym ustazǵa Mınıstr myrzadan jyly lebizge toly hat kelse, qandaı̆ kúı̆de bolady dep oı̆laı̆syzdar? Árıne, qýanasyń, jumysyńa degen shabytyń oıanady, mamandyǵyńa degen qurmet artady. Mine, osyndaı̆ túrli emotsııalardy basymnan ótkerdim», - deıdi Tolqyn Batyrbaı̆qyzy.


Avtor Rýslan Ǵabbasov
Basty sózder: QR Úkimeti, Koronavırýs, Bilim,
Joǵary qaraı