Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Arýjan Saın Almaty balalar úıinde sábıdi uryp-soǵyp jatqan vıdeoǵa túsinikteme berdi

2021 jyldyń 15 qyrkúıek 2021 16:25

ALMATY. QazAqparat - Bala quqyqtary jónindegi ýákil Arýjan Saın Almatydaǵy balalar úıiniń qyzmetkeri tárbıelenýshini uryp-soǵyp jatqan vıdeo men sýretke qatysty túsinikteme berdi, dep habarlaıdy QazAqparat tilshisi.

Vıdeo Almatydaǵy «Januıa» mamandandyrylǵan kesheninde túsirilgen.

«Keshe ınternette osy mekeme tárbıelenýshileriniń anyq fızıkalyq zorlyq-zombylyq pen kútimsizdik belgileri bar sýretteri men vıdeolary taratyldy. Alaıda, balalardyń maǵan usynylǵan vıdeolarynda, olarda jaraqattyń, uryp-soǵýdyń izderi kórinbeıdi. Balalar úıiniń qazirgi dırektory memleket atynan mekeme tárbıelenýshileriniń resmı qamqorshysy bolyp esepteledi. Bul vıdeo men fotolardy kim, qashan jáne qandaı jaǵdaıda túsirgenin anyqtaý úshin ol Almaty Polıtsııa departamentine jáne prokýratýraǵa júginýge mindetti. Men osy vıdeony túsirgen qyzmetkerlerdiń nelikten polıtsııaǵa ýaqytynda júginbegenin, óz mindetterin oryndamaı, balalardyń quqyqtaryn qorǵamaǵanyn anyqtadym», - dedi Arýjan Saın.

Almaty qalasynyń prokýratýrasy Bala quqyqtary jónindegi ýákil Arýjan Saınniń bastamasymen osy ortalyqta tekseris júrgizdi. Tekseris barysynda kóptegen buzýshylyqtar anyqtaldy. Burynǵy basshylyq pen birqatar qyzmetkerlerge qatysty birneshe qylmystyq is tirkeldi.

Qala prokýratýrasy mekeme qyzmetkerleriniń jalaqysyn negizsiz artyq tóleý, taýarlyq-materıaldyq qundylyqtardyń, onyń ishinde demeýshilik kómektiń jetispeýshiligi, mekeme úı-jaılaryn aǵymdaǵy jóndeý boıynsha naqty oryndalmaǵan jumystarǵa aqy tóleý faktileri anyqtalǵanyn habarlady.

Tekserý materıaldary boıynsha 58 mln teńge kóleminde bıýdjet qarajatyn jymqyrý faktileri boıynsha qylmystyq is qozǵaldy. Qazirgi ýaqytta Almaty qalasy boıynsha Ekonomıkalyq tergeý departamenti Qazaqstan Respýblıkasy Qylmystyq kodeksiniń 189-baby 3-bóligi 1-tarmaǵy boıynsha sotqa deıingi tergeý júrgizýde.


Avtor Dýman Arǵyngeldi
Basty sózder: Qoǵam, Adam quqyǵy, Almaty,
Joǵary qaraı