Túrkistan oblysynda kásipkerlikti damytýǵa arnalǵan ulttyq joba iske asady
TÚRKІSTAN. QazAqparat - Túrkistan oblysynda kásipkerlikti damytýǵa arnalǵan ulttyq joba iske asady, dep habarlaıdy QazAqparat tilshisi.
Atalǵan jobanyń basty maqsaty - azamattardyń óz isin ashý men damytýyna jaǵdaı jasaý, sýbsıdııalanatyn jumys oryndaryn uıymdastyrý arqyly kásipkerlerdi qoldaý.
«2021-2025 jyldary kásipkerlikti damytý» atty ulttyq joba 10 mindetten tursa, onyń 3-i halyqty jumyspen qamtý úshin járdemdesýge baǵyttalǵan.
Bul týraly Túrkistan oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva aıtyp ótti.
Jalpy Túrkistan oblysynda búginde 142 myńǵa jýyq shaǵyn jáne orta kásipkerlik sýbektileri jumys isteýde. Bul kórsetkish boıynsha oblys elimizde ekinshi orynǵa turaqtaǵan. Al, Túrkistan qalasynyń ózinde 13 myńnan astam shaǵyn jáne orta bıznes sýbektileri jumys istep jatyr.
Túrkistan oblysy isker áıelder qaýymdastyǵynyń tóraıymy Inara Namazbaeva
búginde Túrkistan qalasy kásipkerlik, ónerkásip jáne týrızm salalary boıynsha damyp jatqandyǵyn jetkizdi.
«Shahar kóne Jibek jolynyń boıynda ornalasqandyqtan kásipkerlik mundaǵy aldyńǵy qatarly salalardyń biri bolyp tabylady. Kásipkerlerdi qoldaý maqsatynda Túrkistan oblysy Kásipkerler palatasynyń Óńirlik keńsesi qarqyndy jumys júrgizýde» - deıdi, Inara Namazbaeva.
Sonymen qatar, Túrkistan oblysy isker áıelder qaýymdastyǵy kásipkerlik salada áıelderdiń belsendiligin arttyrý maqsatynda bıznes ıdeıalarǵa qoldaý kórsetýde. Munda kez-kelgen qyz-kelinshek keńes alyp qana qoımaı, is júzinde kómek pen qoldaý ala alady.
