ShQO-da koronavırýs statsıonarlary 15,6% júktelgen
ÓSKEMEN. QazAqparat – Shyǵys Qazaqstan oblysynda koronavırýs naýqastaryna arnalǵan statsıonarlarda tósek-oryn júktemesi 15,6% quraıdy, dep habarlaıdy QazAqparat tilshisi.
ShQO Densaýlyq saqtaý basqarmasy baspasóz qyzmetiniń málimetine súıensek, óńir boıynsha sońǵy táýlik ishinde COVID-19 ınfektsııasyn juqtyrǵan 33 adam tirkeldi. Onyń ishindegi 32 naýqasta sımptom bar bolsa, 1 adam syrqatty sımptomsyz ótkerýde.
«Bir kúnde 47 patsıent koronavırýstan tolyqtaı saýyǵyp shyqty. 4 sımptomsyz vırýs tasýshy úı karantınin aıaqtady. Qazirgi ýaqytta oblys boıynsha statsıonar jaǵdaıynda 367 patsıent em-dom qabyldap jatyr. Jalpy oblysta statsıonarlarda tósek-oryn júktemesi – 15,6% quraıdy», - delingen aqparatta.
Esterińizge sala ketsek, osyǵan deıin elimizde koronavırýs juqtyrǵan 353 adamnyń jaǵdaıy aýyr ekendigi habarlanǵan.
