Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Belgili tarıhshy Talas Omarbekov dúnıe saldy

2021 jyldyń 6 jeltoqsan 2021 22:15

NUR-SULTAN. QazAqparat – Qazaqtyń kórnekti tarıhshysy, zulmat jyldardyń aqtańdaq betterin ashyp, búgingi urpaqqa qaz qalpynda jetkizgen ǵalym Talas Omarbekov dúnıeden ótti, dep habarlaıdy QazAqparat.

Talas Omarbekov 1948 jyly 29 mamyrda Jambyl oblysynyń Baızaq aýdanyndaǵy Aqjar aýylynda dúnıe esigin ashqan.

Joǵary bilimdi Abaı atyndaǵy QazPI-diń tarıh fakýltetinde alady. 1971 jyly oqýyn támamdap, qyzmet jolyn Jambyl oblysynyń Jýaly jáne Baızaq aýdandarynda tarıh pániniń oqytýshysy, oqý isiniń meńgerýshisi retinde bastady.

Ǵalym qazaqtyń kózi qaraqty qaýymyna Muhamed Haıdar Dýlatı muralaryn, orta ǵasyrlardaǵy tarıhı tulǵalardy ulttyq kózqarasta zerdelep, qazaq tarıhyn kezeńdeýdiń teorııalyq-metodologııalyq máseleleri boıynsha irgeli paıymdar jasaǵan zertteýshi retinde belgili.

Sondaı-aq ol Qazaqstanda stalındik totalıtarlyq júıeniń ornyǵý saldaryn barynsha batyl zerttegen alǵashqy qazaq tarıhshylarynyń biri boldy.

Ótken ǵasyrdyń 20-30-jyldaryndaǵy baılardy tárkileý, kúshtep ujymdastyrý saıasatynyń zardaptaryn ashyq kórsetip, sol tarıhı kezeńde oryn alǵan halyq narazylyqtaryna jańa tarıhı kózqaras qalyptastyrdy.

Ǵalymnyń artynda «Qazaq sharýalaryn menshiginen aıyrý jáne kúshpen ujymdastyrý», «20-30 jyldardaǵy Qazaqstan qasireti» (1997), «HH ǵasyrdaǵy Qazaqstan tarıhynyń ózekti máseleri» (2001), «Qazaqstan tarıhyna jáne tarıhnamasyna ulttyq kózqaras» (2004) sııaqty irgeli eńbekter qaldy. 1997 jyly QR-nyń áleýmettik ǵylymdar Akademııasynyń akademıgi atanǵan.

Tarıhshy kóz jumar sátine deıin «Saıası qýǵyn-súrgin qurbandaryn tolyq aqtaý» jónindegi ulttyq komıssııanyń quramynda belsendi jumys istep, ult-azattyq sıpattaǵy kóterilister men qozǵalystardyń naqty sanyn turaqtandyrýǵa atsalysty.

Aıta keteıik, QazAqparat eki jyl buryn Saıası qýǵyn-súrgin qurbandaryn eske alý kúnine oraı Talas Omarbekovpen suhbat jazǵan bolatyn.


Basty sózder: Qoǵam,
Joǵary qaraı