Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Mashınasyn aýlaǵa qoıýǵa májbúr: Almatyda kólik turaǵy tapshy

2021 jyldyń 6 jeltoqsan 2021 14:53

ALMATY. QazAqparat - Almaty qalasy Bostandyq aýdanynyń ákimi Altaı Rahymbetov aýdanda avtoturaq aımaqtarynyń tapshy ekenin aıtyp, ruqsat etilmegen avtoturaqtarmen qalaı kúresip jatqanyna jaýap berdi, dep habarlaıdy QazAqparat tilshisi.

«Ókinishke qaraı, bizde «Orbıta», «Almagúl», «Kóktem» yqshamaýdandarynda kólik turaǵy tapshylyǵy seziledi. Júrgizýshiler kóligin úı aýlasyna qoıady. Bul durys emes, aýlalar – bizdiń turǵyndardyń, balalardyń bos ýaqytyn ótkizýge, oınaýǵa múmkindik beretin keńistik. Biraq, ókinishke qaraı, búginde mundaı másele bar», – dedi aýdan ákimi.

Sonymen qatar, ol ruqsat etilmegen avtoturaqtarmen kúrestiń qalaı júrip jatqanyn aıtty.

«Jergilikti polıtsııa qyzmetimen birlesip turaqty túrde reıdtik is-sharalar ótkizilip turady. Jasyl aýmaqtarǵa, balalar oıyn alańdaryna kólikterin qoıǵandar ákimshilik jaýapqa tartylady. Sondaı -aq arnaıy avtoturaqtar uıymdastyrylǵan jerde de aqsha únemdeý úshin adamdar kólikterin aýlaǵa qoıady. Qazirdiń ózinde turǵyndardyń ózderiniń mádenıetine qatysty másele bar», - dedi Altaı Rahymbetov.

Onyń aıtýynsha, búgingi kúni turǵyn úı salý kezinde turaq qarastyrylmasa, oǵan ruqsat berilmeıdi. Kópdeńgeıli avtoturaq salý máselesi de qarastyrylyp jatyr.

«Biz kópdeńgeıli avtoturaqtardyń qurylysyn qarastyryp, ınvestorlardy tartyp jatyrmyz, biraq bul jobalar uzaqqa sozylatynyn aıtqym keledi, sondyqtan barlyq ınvestorlar óz qarajatyn salýǵa daıyn emes. Biraq, soǵan qaramastan, biz bul máseleni ári qaraı qarastyramyz, nátıjeleri týraly qosymsha habarlaımyz», - dedi spıker.


Avtor Alma Muqanova
Basty sózder: Kólik, Almaty, Jergilikti organdar,
Joǵary qaraı