«Nur-Sultan-Kókshetaý» tasjolynda otshashý tıelgen júk kóligi órtendi
KÓKShETAÝ. QazAqparat - Aqmola oblysy aýmaǵynda «Nur-Sultan-Kókshetaý» tasjolynda pırotehnıkalyq otshashý tıelgen júk kóligi otqa orandy, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, tótenshe jaǵdaı búgin saǵat 21:26 shamasynda «Nur-Sultan-Kókshetaý» tasjolynyń 212 shaqyrymynda oryn alǵan.
«Anyqtalǵandaı, pırotehnıkalyq otshashý tıelgen «DAF» júk kóligi órtendi. Órtti sóndirýge TJD jeke quramynan 10 adam jáne 3 arnaıy tehnıka jumyldyryldy. Órt shyǵý sebepteri men saldary anyqtalýda», - dedi vedomstvodan.
Aıta keteıik, oqıǵa ornynda kýágerler qyzyl jalynǵa oranǵan kólikten aspanǵa atqylap jatqan otshashýdy beınejazbaǵa túsirip, áleýmettik jelide bólisýde.
Órtten júk kóliginiń tirkemesi tolyq janyp ketti.
Kýágerlerdiń sózinshe, zardap shekkender joq.
