Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Aýyl sharýashylyǵynda óndirýshiden tutynýshyǵa deıin deldaldar ornyǵyp alǵan - Senat

2021 jyldyń 3 jeltoqsan 2021 11:00

NUR-SULTAN. QazAqparat – Senat tóraǵasy Máýlen Áshimbaev aýyl sharýashylyǵy salasyna qatysty zań jobalary týraly aıtty, dep habarlaıdy QazAqparat tilshisi.

«Agrarlyq sektordy odan ári damytý úshin sheshýdi qajet etetin birqatar mańyzdy mindetter de bar. Naqty aıtsaq, bıyl elimizdiń keıbir óńirlerinde bolǵan qýańshylyq jaıylymdyq jerler men jem-shóp daıyndaýǵa qatysty biraz máseleniń basyn ashyp berdi. Jem-shóp óndirisi aýyl sharýashylyǵynyń mańyzdy baǵyttarynyń biri. Bıylǵy tapshylyqqa aýa-raıymen qatar jem-shóp daqyldaryna arnalǵan alqaptardyń jetkiliksiz bolýy da óz áserin tıgizdi. Bul rette, qurǵaqshylyqqa tózimdi agrodaqyldardy ósirýdi yntalandyrýǵa baǵyttalǵan keshendi is-sharalardy qolǵa alý kerektigin mamandar kóterýde», - dedi M. Áshimbaev Senatta «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.

Onyń aıtýynsha, usaq sharýashylyqtardy, onyń ishinde jeke qosalqy sharýashylyq kooperatsııalaryn damytý atalǵan máselelerdi sheshýde mańyzdy ról atqarady. Osy rette Memleket basshysynyń tapsyrmasyna sáıkes jeke qosalqy sharýashylyq mártebesi men olarǵa kórsetiletin memlekettik qoldaýdy aıqyndaıtyn jáne usaq taýar óndirýshilerdiń kooperatsııasyn damytýǵa arnalǵan tıisti zań jobasyn ázirleýdiń mańyzy zor.

«Sonymen qatar veterınarııa salasyn jetildirý de asa mańyzdy. Bul máseleni senatorlar dáıekti túrde kóterýde. Infektsııalyq aýrýlardyń turaqty órshýi bul salada júıeli sıpattaǵy problemalar bar ekenin kórsetip otyr. Ol máselelerdi sheshý tamaq ónimderiniń qaýipsizdik dárejesine jáne mal ónimderin eksporttaýǵa da tikeleı áser etetini anyq. Sondyqtan Úkimet veterınarııa máselelerine erekshe nazar aýdaryp, olardy eńserý úshin tıisti sharalar qabyldaýy qajet», - dedi Senat tóraǵasy.

«Aýyl sharýashylyǵyn qarjylandyrý júıesin jetildirý de mańyzdy máselelerdiń biri. Qazirgi qoldanystaǵy sýbsıdııalaý júıesinde birqatar máseleler bar. Memleket basshysy qyrkúıek aıyndaǵy Joldaýynda osy taqyrypqa erekshe nazar aýdarǵanyn jaqsy bilesizder. Sondyqtan tıisti mınıstrlik pen «Báıterek» holdıngi salany sýbsıdııalaý jónindegi qoldanystaǵy normatıvtik quqyqtyq aktilerge taldaý jasap, oryn alǵan olqylyqtar men kemshilikterdi joıý jóninde naqty usynystar ázirleýi qajet. Bul saladaǵy taǵy bir ózekti másele - azyq-túlik taýarlaryna ádil baǵa belgileý bolyp otyr. Ónimniń keıbir sanattary boıynsha ımporttyń úlesi aıtarlyqtaı kóp ekeni jasyryn emes. Sondaı-aq, aýyl sharýashylyǵy ónimderin óndirýshiden tutynýshyǵa deıingi jolǵa deldaldar ornyǵyp alǵan. Osy sebepti atalǵan ónimderdiń baǵasy aıtarlyqtaı ósip otyr. Osy baǵytta Memleket basshysynyń tapsyrmasy boıynsha kóterme-taratý ortalyqtarynyń jelisin damytý – ózekti maqsattardyń biri», - dedi Máýlen Áshimbaev.


Joǵary qaraı