Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qazaqstanda bilim salasynda 250 sybaılas jemqorlyq faktisi tirkelgen

2021 jyldyń 2 jeltoqsan 2021 18:01

NUR-SULTAN. QazAqparat - Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti, dep habarlaıdy Aqordanyń baspasóz qyzmeti.

Qazaqstan Respýblıkasynyń Memlekettik hatshysy Qyrymbek Kósherbaevtyń tóraǵalyǵymen Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııanyń kezekti otyrysy ótti.

Komıssııa otyrysynda ınfraqurylymdy damytý boıynsha «Nurly jol» memlekettik baǵdarlamasynyń qorytyndysy qarastyryldy.

Atalǵan baǵdarlamanyń iske asyrylýy birqatar salany damytýǵa, atap aıtqanda, ishki jalpy ónimdi arttyrýǵa, jańa jumys oryndaryn ashýǵa, tranzıt kólemin kóbeıtýge yqpal etti.

Odan bólek jahandyq ekonomıkalyq daǵdarystyń áserin azaıtýǵa da septigin tıgizdi.

Degenmen, memlekettik organdar maqsatty ındıkatorlar men nátıjelerdiń bárine birdeı qol jetkizbegen.

Budan bólek quqyq qorǵaý jáne baqylaýshy organdar jekelegen qarjylyq quqyq buzýshylyqtardy, sondaı-aq bıýdjet qarjysynyń tıimsiz josparlanǵanyn anyqtaǵan.

Jıynda atalǵan másele jan-jaqty talqylanyp, ony sheshýge jáne aldaǵy ýaqytta mundaı olqylyqtarǵa jol jibermeýge qatysty naqty usynystar berildi.

Komıssııa otyrysynda orta jáne joǵary bilim berý baǵytyn damytýǵa bólinetin qarjynyń tıimdi jumsalýyna qatysty júrgizilgen memlekettik aýdıttiń qorytyndysy da talqylandy.

Atalǵan baǵytta Esep komıteti birqatar problemany anyqtady.

Al Sybaılas jemqorlyqqa qarsy is-qımyl jáne Qarjylyq monıtorıng agenttikteri 250 qylmystyq quqyq buzýshylyqty tirkegen.

Kemshilikterdi joıý úshin Bilim jáne ǵylym mınıstrligine, respýblıkalyq mańyzy bar qalalar men oblystardyń ákimderine qatysty qatań shara qabyldaý tapsyryldy.

Sondaı-aq «Bilimdi ult» sapaly bilim berý» ulttyq jobasyn iske asyrý barysynda qarjy jymqyrý, qyzmetin asyra paıdalaný sekildi zań buzýshylyqtarǵa jol berilmeýi qajet ekenine nazar aýdaryldy.

Jıyn qorytyndysy boıynsha Memlekettik hatshy Qyrymbek Kósherbaev talqylanǵan máseleler boıynsha memlekettik jáne atqarýshy organdarǵa birqatar tapsyrma berip, olardyń oryndalýy qatań baqylaýda bolatynyn aıtty.


Joǵary qaraı