Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Elbasyna berilgen dıplomatııalyq syılyqtar: Tuńǵysh Prezıdent Mýzeıinde qandaı zattar saqtaýly tur

2021 jyldyń 1 jeltoqsan 2021 17:51

NUR-SULTAN. QazAqparat – Nur-Sultan qalasynda ornalasqan QR Tuńǵysh Prezıdenti – Elbasy kitaphanasynyń mýzeıinde túrli ekspozıtsııalar saqtaýly, táýelsiz Qazaqstannyń qalyptasýy men damý kezeńderin beıneleıtin biregeı eksponattar usynylǵan. Munda Elbasynyń jeke zattary, memleket basshylary tartý etken syılyqtar men tarıhı rarıtetter jınaqtalǵan, dep habarlaıdy QazAqparat.

Mýzeıde Táýelsiz Qazaqstannyń qalyptasýy men damýynyń negizgi kezeńderin aıshyqtaıtyn biregeı eksponattar usynylǵan.

QR Tuńǵysh Prezıdenti - Elbasy kitaphanasynyń mýzeı qundylyqtaryn esepke alý jáne saqtaý qyzmetiniń basshysy Kúláısha Aqtaeva dıplomatııalyq syılyqtardyń – Elbasy Nursultan Nazarbaevtyń saıasatyn baǵalaý jáne moıyndaý ekenin atap ótti. Eksponat mýzeıge jetkizilmeı turyp, muqııat zertteledi. Ǵımaratta Elbasynyń jeke qalamsabynan bastap, ár túrli jazbalar, Tuńǵysh Prezıdent mingen úlken kólikterge deıin saqtalǵan. Atap aıtqanda, munda 90-shy jyldardyń sońynda N. Nazarbaev mingen arnaıy brondalǵan Mercedes-ter bar.





«Bul eksponattardyń barlyǵy 15-20 jyl ishinde jınalǵan jáne taqyryptyq bólimderge bólingen. Aldaǵy ýaqytta da mýzeıge qandaı eksponat túsetinin, qashan túsetinin bilmeımiz. Biz osynyń bárine zertteý júrgizemiz. Kelýshiler mýzeıde túpnusqa materıaldarmen, muraǵattyq málimettermen tanysady. Al Nursultan Ábishulyna tartý etilgen dıplomatııalyq syılyqtar árdaıym arhıv qoryna túsip turady. Bizdiń zaldarda dıplomatııalyq syılyqtar óte kóp. Bul – tek sypaıylyqtyń belgisi ǵana emes, basqa memleketter men úkimetterdiń basshylarymen dostyq qarym-qatynastyń, sonyń arqasynda júzege asyrylǵan sátti baılanystardyń tikeleı dáleli», - dedi Kúláısha Aqtaeva.

Mysaly, mýzeıde AQSh-tyń burynǵy prezıdenti Donald Tramp syıǵa tartqan golf taıaqshasy men kitap bar. Al golf taıaqshasy qalanyń oń jaǵalaý atalatyn bóligindegi mýzeıge tapsyryldy.




«Mýzeıdegi dıplomatııalyq syılyqtar Nursultan Nazarbaev pen qandaı da bir eldiń basshysy arasyndaǵy mańyzdy zııatkerlik jáne emotsıonaldyq baılanystyń bir bóligine aınaldy. AQSh prezıdenti Donald Tramp kezdesýlerdiń birinde oǵan golf jıyntyǵyn berdi jáne AQSh-taǵy golf alańdarynyń tarıhyn sıpattaıtyn ádemi kitap syılady. ıAǵnı, Donald Tramp óz áriptesiniń artyqshylyqtaryn jaqsy zerttep, arnaıy syılyq daıyndady. Al jeke zattardan Elbasynyń ulyqtaýǵa kıgen kostıýmderi, qalamdary, sporttyq kıimderi men kerek-jaraqtary bar», - deıdi Q. Aqtaeva.

Mýzeıdiń habarlaýynsha, kitaphana qorynda sırek kezdesetin, kollektsııalyq jáne eski basylymdar da saqtaýly. Onyń arasynda Qazaqstannyń Tuńǵysh Prezıdentine Mılandaǵy Ambrozıan kitaphanasy syıǵa tartqan Leonardo Da Vınchıdiń eskızderi bar albom, Elbasyna qazaqstandyq ǵaryshker T.Musabaev bergen ǵaryshta bolǵan Quran kitaby, qasıetti Quran basylymdarynyń kollektsııasy, Reseı ımperatory Aleksandr II kitaphanasynda saqtalǵan F. Shlosserdiń «Dúnıejúzi tarıhy» eńbegi, 1838 jylǵy entsıklopedııalyq leksıkon jáne basqa da ekspozıtsııalar bar.




Máselen, mýzeıdiń «Dańq galereıasynda» Nursultan Nazarbaevtyń jetekshiligimen Qazaqstannyń tabysty jahandyq saıasatynyń kýálikteri jınaqtalǵan. Bul zalda dıplomatııalyq syılyqtar, sýyq qarý toptamasy jáne 50-den astam joǵary memlekettik jáne qoǵamdyq nagradalardan turatyn erekshe qundy eksponattar bar. Dálirek aıtqanda, ústel saǵattary, dýlyǵa, kádesyılar, grafınder, kamın saǵattary, tostaǵandar, sándik qumyralar, kádesyı tabaqtary jáne ydys-aıaq jıyntyǵy bar.









Joǵary qaraı