Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almaty kóshelerin jaryqtandyrý máselesi qalaı sheshilip jatyr

2021 jyldyń 30 qarasha 2021 21:37

ALMATY. QazAqparat - Óńirlik kommýnıkatsııalar qyzmetinde ótken baspasóz máslıhatynda qala ákiminiń orynbasary Muhıt Ázirbaev syrtqy jaryqtandyrý júıesi týraly aıtty, dep habarlaıdy QazAqparat tilshisi.

Spıkerdiń sózinshe, Almatyda zamanaýı jabdyqtar men tehnologııalardy paıdalana otyryp, kóshe jaryqtandyrýyn basqarý júıesi jumys isteıdi.

Jańǵyrtýdyń basty maqsaty - kósheni jaryqtandyrý jumysyn jaqsartý jáne oǵan qyzmet kórsetý shyǵyndaryn qysqartý.

Memlekettik-jekeshelik áriptestik sharty aıasynda 2019-2020 jyldar aralyǵynda qalanyń 14 magıstraldy kóshesi boıynsha 11 161 sham aýystyryldy, bul qalalyq shamdardyń jalpy sanynyń 8 paıyzy.

Muhıt Ázirbaev bul shamdardy aýystyrý jyl saıyn elektr energııasynyń 20% únemdeıtinin atap ótti.

«Aǵymdaǵy jyly 27 kósheni jańǵyrtý josparlanǵan, onyń aıasynda 5 myńǵa jýyq sham men 2 myń tirek aýystyrylatyn bolady. Osy baǵyttaǵy jumystardyń 90% aıaqtaldy. 2023 jyldyń sońyna deıin taǵy 33 145 LED sham ornatý josparda»,- deıdi Muhıt Ázirbaev.

Onyń aıtýynsha, kóshe jaryǵynyń jaǵdaıyn qashyqtyqtan basqarý men baqylaýdyń keń múmkindikteri, jabdyqtyń saqtalýyn qamtamasyz etý jáne tutynylatyn energııany naqty esepke alý atalǵan jańǵyrtýdyń artyqshylyǵy bolmaq.

«Zamanaýı tehnologııalardy qoldaný elektr taratý jelilerindegi apattyq deńgeıin aıtarlyqtaı tómendetedi, shtattan tys jaǵdaılardy joıý kezinde, sondaı-aq josparly profılaktıkalyq jáne jóndeý jumystaryn júrgizý kezinde ýaqytty únemdeıdi. Búgingi tańda jańa kóshe shamdarynyń jumysyndaǵy aqaýlardy joıý 2-3 saǵattan aspaıdy. Sondaı-aq elektr taratýdyń áýe jelilerin jerasty kábildik oryndaýǵa kóshirý arqasynda múmkin bolǵan «taza aspan» tujyrymdamasynyń iske asyrylýyn atap ótken jón»,- deıdi spıker.

Almaty ákiminiń tapsyrmasy boıynsha «Shetsiz qala» baǵdarlamasy da iske asyrylyp jatyr.

Byltyr 1 423 kóshe jaryqtandyrylyp, energııa únemdeıtin shamdar qoldanyldy.

2021 jyldyń 11 aıynda Almaly, Áýezov, Bostandyq, Medeý aýdandaryndaǵy 601 kóshege sham ornatý josparlanǵan.

Búginde atalǵan jumys 540 kóshede (90%) oryndaldy.

Muhıt Ázirbaevtyń aıtýynsha, kelesi jyly qalǵan 1 066 ishinara jaryqtandyrylmaǵan kósheni jaryqtandyrý jumysyn jalǵastyrý josparda.

«Almaty aýlalary da qala bıliginiń nazarynan tys qalmaıdy. Máselen, qalanyń aýla aýmaqtaryn jaryqpen qamtamasyz etý boıynsha joba ázirlendi. Qazirgi ýaqytta qalanyń 486 aýla aýmaǵynda qurylys jumystaryn júrgizý úshin merdiger uıymdy anyqtaý boıynsha konkýrstyq rásimder júrgizilýde»,-deıdi Almaty ákiminiń orynbasary Muhıt Ázirbaev.


Joǵary qaraı