Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Qaraǵandy oblysynyń kásiporyndary qandaı jańa ónim shyǵarady

2021 jyldyń 29 qarasha 2021 16:04

QARAǴANDY. QazAqparat - Qaraǵandy oblysynda ındýstrııalandyrý jyldary óńdeý ónerkásibinde 68 joba iske asyryldy. Bul salany jańa deńgeıge shyǵardy. Damý jalǵasýda – 2025 jylǵa deıin taǵy da ondaǵan iri jobalardy iske asyrý josparlanǵan, dep habarlaıdy QazAqparat oblys ákimdigine silteme jasap.

Onlaın rejımde ótken apparattyq keńeste óńdeý ónerkásibiniń jaı-kúıi men perspektıvalary talqylandy.

«2015 jyldan bastap óńdeý ónerkásibiniń kólemi 16,2%-ǵa, eńbek ónimdiligi 20,3%-ǵa, shıkizattyq emes eksport 32%-ǵa ósti. 2021 jyldyń 10 aıynda ónim shyǵarý 2,8 trln teńgeni qurady», - dep habarlady ónerkásip jáne ındýstrııalyq-ınnovatsııalyq damý basqarmasynyń basshysy Murat Qydyrǵanbekov.

Oblystyń JÓÓ-degi óńdeýshi ónerkásiptiń úlesi 36%-dan asty.

Baıandamashy óńir kásiporyndary qandaı jańa ónim shyǵaratynyn aıtty. Bul bolat arqan, sharly kran, otqa tózimdi materıaldar, aldyn ala oqshaýlanǵan qubyrlar, ferrosılıtsıı, dıirmenderge arnalǵan rezeńke-metall tósenishter jáne basqalar. Buryn munyń bárin shetelden ákelýge týra keldi.

Oblysta mashınalar men jabdyqtardy jóndeý boıynsha qyzmetterdiń damýy baıqalady. Sondaı-aq kenishter men karerlerde jumys isteıtin aýyr júk tıegishterge arnalǵan qosalqy bólshekter óndirisi artty.

Jeńil ónerkásip, farmatsevtıka kólemi ósýde.

Bılik jergilikti qamtýdy damytý boıynsha jumys júrgizip keledi. Bul qoldaý kásiporyndardyń turaqty jumys isteýine jáne jumys oryndarynyń saqtalýyna yqpal etedi.

«Indýstrııalandyrý baǵdarlamasy boıynsha 2010 jyldan bastap oblysta óńdeý ónerkásibinde 68 joba iske asyryldy. Investıtsııanyń jalpy somasy 243 mlrd teńgeni qurady. 6 myńnan astam jańa jumys orny ashyldy, – dep atap ótti oblys ákimi Jeńis Qasymbek. – Bul sektorda taǵy da birqatar iri jobalar iske asyrylýda. Avtomobıl shınalaryn, joǵary sapaly izbest, arnaıy koks shyǵaratyn zaýyttar salynýda. Jalpy, 2025 jylǵa deıin 2,2 trln teńgege 50 ınvestıtsııalyq jobany iske asyrý josparlanǵan, olardyń basym bóligi óńdeýshi ónerkásipte».

Óńir basshysy salany damytý jáne josparly kórsetkishterge qol jetkizý jóninde birqatar tapsyrma berdi.


Basty sózder: Qaraǵandy oblysy, Ónerkásip,
Joǵary qaraı