Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

SQO-da úı karantınin buzǵandarǵa 5 mln teńgege jýyq aıyppul salyndy

2021 jyldyń 26 qarasha 2021 15:41

PETROPAVL. QazAqparat – Soltústik Qazaqstan oblysynda monıtorıngtik toptar tekseristi kóbeıtip, talapty buzǵandarǵa aıyppul salyp jatyr, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń málimetinshe, qazirgi ýaqytta óńirde 23 monıtorıngtik top bar. Olar juma-jeksenbi kúnderi aralyǵynda qoǵamdyq tamaqtaný, kóńil kóterý oryndaryna reıd uıymdastyryp keledi. Osylaısha 1 qarashadan 25 qarashaǵa deıingi aralyqta monıtorıngtik toptar 1 092 nysandy qamtyǵan 202 reıd júrgizdi. Shekteý sharalarynyń kúsheıtilgenine qaramastan oıyn-toı ótkizgender anyqtalyp, jazalandy. 26 adamǵa shamamen 1,5 mln teńgeniń aıyppuly salyndy.

«Ókinishke oraı, buqaralyq is-sharalar, dámhana-meıramhanalarda toı ótkizý faktileri apta saıyn tirkeledi. Búlingen mereke men «rásýa bolǵan aqshadan» basqa, jınalǵan adamdarǵa KVI juqtyrý qaýpi joǵary ekenin eske salamyn», - deıdi SQO sanıtarııalyq-epıdemıologııalyq baqylaý departamentiniń basshysy Áset Jumataev.

Úı karantınin buzyp, «Ashyq» jobasy arqyly qoǵamdyq oryndarǵa ótpek bolǵan 126 adam anyqtaldy. Olar jaýapkershilikke tartylyp, 4 mln 897 myń teńge aıyppul tóledi.

Buǵan deıin SQO-da koronavırýsty juqtyrý jaǵdaılarynyń sońǵy eki aptada 5,3 %-ǵa tómendegenin aıtqan edik. Alaıda aýrýhanaǵa aýyryp túsip jatqandardyń 60 %-ynyń jaǵdaıy aýyr, olar medıtsınalyq ottegige táýeldi. Mamandar muny vaktsınatsııa qarqynynyń tómendeýimen jáne turǵyndardyń karantındik talaptardy oryndamaýymen baılanystyryp otyr.





Joǵary qaraı