Polıtsııa astanalyq kólik júrgizýshilerge úndeý jasady

NUR-SULTAN. QazAqparat – Nur-Sultan qalasy polıtsııa departamenti kólik ıelerine aýa raıynyń qolaısyzdyǵyna baılanysty jolda asa muqııat bolý kerektigin eskertti, dep habarlaıdy QazAqparat tilshisi

«Qar tolassyz jaýǵandyqtan arnaıy tehnıka elorda kóshelerin tazalaý úshin táýliktik rejımen jumys istep jatyr. Júrgizýshilerdi kóligin jol boıynda qańtarmaýǵa shaqyramyz. Bul qar kúreý jumystary men qoǵamdyq kóliktiń qozǵalysyna kedergi keltiredi.

Jol júrý erejelerin qatań saqtap, jyldamdyq pen jáne qaýipsiz qashyqtyq rejımin saqtańyz», -dep jazady departamenttiń baspasóz qyzmeti.

Polıtsııa turǵyndarǵa qaladan alystap shyqpaýǵa keńes berip otyr.

«Qala ishinde de dittegen jerge baratyn marshrýtty aldyn ala josparlap, qozǵalys jolaǵyn kenet aýystyrmaý, aıaq astynan tejegish baspaý mańyzdy. Boran men kóktaıǵaq kezinde qozǵalys táýekeli artady.

Jaıaý júrginshilerge de óte muqııat bolý kerek. Joldan ótken kezde gadjetterge úńilmeı, qulaqqapty alyp, aınalaǵa nazar salý qajet. Sondaı-aq qyzmet kórsetetin kompanııalar ókilderine turǵyn úı keshenderiniń aýlasyn qardan tazalaý jumystaryn ýaqtyly uıymdastyrý qajet ekenin eskertemiz», - delingen departamenttiń málimetinde.