ShQO-da JRVI-men aýyrǵandar sany 80 myńǵa jýyqtady
ÓSKEMEN. QazAqparat – Shyǵys Qazaqstan oblysynda bıyl JRVI-men aýyrǵandar sany 80 myńǵa jýyqtady, dep habarlaıdy QazAqparat tilshisi.
ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, óńirde jyl basynan beri jiti rıspıratorlyq vırýstyq ınfektsııamen aýyrǵandar sany 79 406 adamdy qurap otyr. Onyń jartysyna jýyǵy – balalar.
«Jalpy aımaq boıynsha JRVI-ge shaldyqqan adam sany jaǵynan Óskemen qalasy aldyńǵy orynda tur. Shaharda 40 388 naýqas tirkelgen. Al eń tómengi satydaǵy Tarbaǵataı aýdanynda – 15 turǵyn jiti rıspıratorlyq vırýstyq ınfektsııamen aýyrdy», - delingen aqparatta.
Vedomstvo ókilderiniń dereginshe, ótken jylmen salystyrǵanda atalǵan ınfektsııamen syrqattaný deńgeıi 1,2 esege artyp otyr.
