Elordada shetelden ushyp kelgen 108 adam karantınge jatqyzyldy

NUR-SULTAN. QazAqparat – Qazannyń 25-inen 26-syna qaraǵan túni halyqaralyq reıster boıynsha elordanyń áýejaıyna 6 ushaq kelip qondy, dep habarlaıdy QazAqparat tilshisi.

Áýe reısterin Air Astana, Turkish Airlines,Belavia jáne Flydubai áýe kompanııalary oryndaǵan. Kelgen 722 jolaýshynyń ishinde 108-inde PTR-test anyqtamasy bolmaǵan. Olardyń bári de statsıonarlyq karantınge jatqyzyldy. PTR-testten ótkennen keıin atalmysh jolaýshylarda vırýs anyqtalmasa úıine, anyqtalsa ınfektsııalyq statsıonarǵa barady.

2020 jyldyń 27 qazanynan bastap QR bas memlekettik sanıtarlyq dáriger Erlan Qııasovtyń jańa qaýlysy kúshine enedi. Oǵan sáıkes memlekettik shekaralardaǵy ótkizý pýnkterinde koronavırýs ınfektsııasynyń taralýyn boldyrmaý maqsatynda sharalar kúsheıtilmek. Jańa qaýly boıynsha Qazaqstanǵa kelgen azamat kem degende úsh kún buryn PTR-testten ótkeni týraly anyqtamany tapsyrýy kerek. 5 jasqa deıingi balalardan bul talap etilmeıdi. Alaıda kishkentaı balany alyp júrgen ókilinde osyndaı anyqtama bolýy tıis.

Halyqaralyq tranzıttik jolaýshylar tranzıttik aýmaqtan ketpeýi kerek.

Áýe kompanııalarynyń basshylary qonǵan áýe kemesiniń bortyna PTR-anyqtamasy joq shetel azamattaryn kirgizbeýi tıis.